見完佢阿爸既親戚，又要我見佢呀媽既親戚

[匿名]

講返背景：我（女），每星期返六日工，另有間網店，主要夜晚/星期日做網店，每日平均只訓6個鐘最多。月入約50k，住私樓，家人只幾個，親戚關係疏離。（男），每星期可返五日/六日，月入36K，住居屋，有大量親戚。

呢幾個月嚟，大家為同一件前嘈，就係佢逼我去佢親戚拜年。上年跟佢去拜年前，我都有嘗試做好我既本份，買好7-8份賀禮（佢既團拜係成廿個人）。當時佢彈三彈四，覺得我買得cheap （我預一百蚊左右一盒，系大超市買，都為左佢而行左好多間吾同超市/商場去準備），果時佢係俾說話我聽，覺得我買得cheap，我已經反感，因為佢無欣賞過我付出既心機時間。到今年，雖然佢話賀禮佢準備（傻傻的佢係會有咁貴買咁貴去討好長輩果種），就算我吾理賀禮呢部分，我都十分吾想再去。

原因：廿人食盆菜吾用公筷都無口罩、全晚二手煙不絕、間屋環境係全場好多白光管（本身係易流眼水，訓得吾夠更加會）、食物係無得揀、同佢班人0話題覺得好尷尬、地點時間係被指定（即我星期六收七點都要仆去，成個鐘先到）、全場班人男女講野都超大聲。但男方覺得點都要俾面去，話自己已經讓左步無每一次大型家庭聚會都要我去，（佢地每幾個月就搞生日會、清明重陽都要搞大型家庭聚會），所謂讓步系我角度根本吾合理，因為我屋企本身要齊日食飯只係做冬新年中秋，五隻手指數得完，同埋只係幾個人食，呀爸呀媽都會問清楚我果日得吾得先約。多次爭吵之後，我讓步，應成去佢呀爸親戚，即去上述提到既廿人團拜。但佢覺得吾足夠，仲要去埋佢呀媽果邊既。果一下我覺得好過份，因為自細我連呀媽親戚都無點見過，我又吾係跟佢呀媽姓，做咩要連佢呀媽既親戚都要去見埋，搞到我好似聯誼大使咁！

但佢覺得我需要去，配合佢。我極反感，覺得佢無視我所有不滿都要照顧佢面子。至分手時，佢都仲係寸步不讓，覺得我係應該去，因為有次我聽吾清楚下（嘈得太激動）應成左佢一年去4次佢既家庭聚會，佢就覺得我應成左次數就一定點都要湊數去見佢要求既親戚！

想問大家，其實我提分手岩吾岩？定真係我好似佢咁講，吾識得人情世故，係我問題？sorry for 1999 寫得可能有點混亂.

[匿名]

你都係人工高人少少就睇佢唔起啫，連帶覺得人地家族冇文化所以唔想去應酬，覺得自己高人一等🤷🏻‍♀️不過分完手你都唔覺得可惜，只係著緊對錯，咁你都唔係太鍾意佢，分手係對的

[匿名]

睇完第一段就覺得你抬高自己，明明唔關第一段事。

[匿名]

我反而好認同女事主wor！
可能我同佢性格、唸法差唔多，所以明白佢。
覺得冇意義同冇需要，同埋三唔識七，有嘢送仲想點
其實冇需要遷就，呢個唔啱咪下一個，又或者自己一個更舒服，加上自己又唔係好得閒，算係咁上下啦
自己又有能力，事主努力搵錢錢啦，一起加油～

[匿名]

成日要應酬真係心很累🙄
我覺得雙方父母就一定要見嘅，佢啲親戚親算啦
賀禮嘅話未結婚點解要送俾佢啲親戚？🙄
如果真係頂唔順真係建議分手，有錢驚咩單身
利申：唔鐘意應酬

[匿名]

關收入咩事

[匿名]

聽你咁講，睇得出你好嬲之餘又好無奈。你曾努力付出嘅心機不被重視，加上佢一直唔尊重你意見，咁落去好難捱…
無論點都好，只要你講清楚自己立場，同佢解釋曬唔想去嘅原因，你有權選擇唔去，而佢都無權用各種理由逼你參與依啲聚會。畢竟一段關係要有基本嘅尊重，先可以一路行落去。如果佢之後繼續逼你遷就佢嘅話，你都只會繼續辛苦落去
另外，都好欣賞你會諗吓自己會唔會有做得唔啱嘅地方。分手係其中一個選項，最重要唔好俾佢依樣嘢成日影響到你嘅情緒

[匿名]

你屋企人小你無錯，佢屋企人多佢都無錯，宜家拍拖已經嫌人地咁多親戚，結左婚點搞？
佢屋企有家庭溫暖係一件再正常不過既事，唔係因為你親戚小 無乜家庭溫暖就覺得太多溫暖係有問題既事
如果你覺得你接受唔到就分手，但你搵下一任個陣麻煩你先查家宅先好決定拍拖

[匿名]

一段長文，重點是大家各方面都不配合，分手是讓相方解脫，完。

[匿名]

就咁睇文字，我覺得呢條女一定好挑剔好自我個類人😂😂😂
算啦 你放生個男仔啦，我相信你類人應該朋友都唔多個

（利申：本身都係女）

[匿名]

我個人覺得未結婚，一年出席一次新年聚會係要嘅～禮物可以同男方一齊揀。
其他聚會有時間咪去囉，冇時間都可以揀啲重要嘅先去，例如對方父母生日。
不過你唔慣大家族就冇辦法啦，人多係會好嘈咖啦～
其實你有幾愛你男朋友咖？唔係好感受倒🙈分手搵過個適合你嘅人啦。搵幾多錢，住咩屋都冇咩關係，你係唔鍾意social同唔係好鍾意男朋友啫。

[匿名]

你第一段野都係想突顯你高高在上，佢配你唔上，唔應該咁多要求啫😂
快啲分手放生個男仔啦

[匿名]

我個人都無咩親情需要拜太多年，我都唔鍾意嘈吵又無話題既場合，更加咪提全場二手煙，我非常理解，加上樓主番6日工重要有副業自己休息時間都唔夠。我睇唔明點解需要講自己住屋同收入背景，畢竟你同得那個人一齊就唔應該攀比呢d。我覺得自己識做適當應酬一年一次拜年係應該既，但係對方都同樣唔應該勉強你，拜年應分但係經常性大型家庭聚會係咪真係每次都一定要出席？如果連休息時間都已經貧乏，佢點解唔體諒下你下下要勉強去配合？加之又無同你約時間，定咗個日期但你可以唔得閒架，點解一定要你去到？其實唔排除係佢見你自細無咩家庭聚會想帶d溫馨比你，但係你地需要溝通，有d外向既人社交會gain energy但係內向既人係會被drain，尤其係唔係自己親戚又無話題過到去好似格格不入純粹陪坐咁，你需要理性討論同對方表達你對呢d環境感到不適而唔係嘈交先拎出黎講。最後就係，既然你都知道陪屋企人都唔多，以後記得擺多d時間係屋企人度啦，「你地又家庭聚會呀？但係我都要陪自己屋企人窩，定係你試下多d黎我屋企人度作客？」，與其去佢親戚度陪笑，分多d時間比自己屋企人咪仲好，又舒服又自在又好拒絕佢，順便邀請佢多d黎陪你屋企人等佢感受下個種係人地屋企侷促唔自在既感覺🤣

[匿名]

你無問題
佢無問題
但兩位+埋一齊就有問題

[匿名]

人情世故唔係用尼道德綁架，你要做都做左，佢淨係掛住自己面子，冇理你感受，咁大男人分得啦

[匿名]

有啲人會覺得兩個人一齊得就好想進入對方嘅世界，你就係唔想果隻；又唔可以話你有錯，價值觀同家庭觀唔同都好難勉強，有啲女仔另一半咁熱烈歡迎佢加入自己家庭圈會覺得對方重視自己，相反你覺得有被逼嘅感覺，咁咪即係唔太夾，分手都適合嘅。