我真係唔放心佢去同事嘅聚會

[匿名]

長文，但係真係好需要大家嘅意見
小弟o1 姊弟戀 同女朋友就嚟一年
大家雙方都係大學生
老實講覺得呢段關係大部份時間都係開心同埋穩定，但係有時候去到嗌交嘅時候又會好極端，完全唔知道要點做，雙方居高不下而且女朋友又唔會覺得自己有問題．．．．一係就用分手做威脅or無視咗佢…

女朋友嘅公司嚟緊舉辦一場同事聚會party，咁我就想佢去，可能螢幕前嘅你哋覺得有咩問題but其實有三個原因。我想知道我應該要點做，或者其實係咪我過分左做唔啱🙏🏻

最緊要就係因為我哋彼此有個承諾我哋係有約定左雙方都唔可以出席有「異性」嘅event 例如party/飯局。我哋既然約好左，就想佢遵守返。我相信我冇違反過承諾，一直以來做乜嘢事情都係全男班，真係好care雙方嘅承諾，所以我想佢遵守返個承諾唔好出席個party。我都承諾咗佢隨着時間推移感情上增進左，我都會開放d去接受，同埋批准佢同異性出街。但係目前呢一刻我都係想穩定啲，真係未接受到住。

第二點就係時間，佢成個月好忙，因為佢呢個月底已經開始咗考試，嚟緊首先要交一份功課(仲要係嗰日去玩嗰時交)第二日要再交多份，同埋緊接着唔夠一個星期嘅時間又要交Exam essay。以我對佢嘅了解，佢會盡攞時間去做到最好，我唔希望佢為咗去玩而搞冧自己身體開夜車趕工或者犧牲我地拍拖時間去做嘢(大佬你而家自己去玩，變相犧牲咗我哋兩個人嘅時間Dllm 公平咩)我就同佢講如果佢冇去玩，相信d時間應該夠佢再執下同改下。佢話同事支持佢去玩，我就認為因為啲同事係full-time大學畢咗業，唔使佢咁仲要擔心essay再加上既然可以happy，梗係會叫上佢，大佬唔通而家你同我嗌交，仲要為咗咁樣拉埋去分手呢個話題，唔見你同事幫你…

仲有最後係關乎安全性，佢係玩到十一二點起跳，加上佢玩完返屋企係有一定嘅距離，凌晨自己一個返屋企，作為男朋友有擔憂，而且佢去嘅party既然大家都係成人，就一定有酒飲。不怕一萬只怕萬一，唔想佢party入面定係返屋企嘅路上出事，又或者係有機會發生酒後亂性啲嘢？

真係想知道可以點樣改善．．

[匿名]

大家不必太harsh，始終佢的確冇咩經驗。
·
冇人一開始就識點拍拖，如果我地用過來人既經驗黎要求同指責佢係唔公平的。
———————————————
希望你明白，出到黎社會同校園係兩個世界。
·
係校園入面，你可以有好大自由；出到黎社會，好多時都身不由己、要承受各種明裡暗裡既壓力，做事要思前想後。
·
聚會派對都有分開「必要」同「非必要」，有冇異性唔係首要考慮。
·
「非必要」既聚會（例如幾個同事私底下約）可以選擇去唔去、影響不大。
·
「必要」既聚會（例如集體飯局）係同事之間social既場合，如果每次都唔去，就會有流言蜚語、亦會失去好多交流/機會。
·
尤其是依家係你女朋友準備投身社會既關鍵時刻。
佢需要鋪路既時候，你擋路就係逼佢撇除你呢個障礙。
—————————
真正愛一個人，唔係「佔有」，而係「尊重」、給予對方自由同支持。
·
拍拖係重要，但唔應該係生活既全部。
·
所有得把口講既都係自私，愛係用行動證明。
你如果擔心佢，唔應該阻止佢去，應該而係送佢返屋企確保佢既安全。

[匿名]

錯晒...完全唔出席冇異性嘅活動係絕對冇可能，你信佢就得 但係擺明你唔信 同埋同事聚會唔係同朋友聚會咁單純，唔係話唔去就唔去.....

[匿名]

1. 一係你都一齊岀席，大方d
2. 一係你用個籠鎖住女朋友
3. 一係分手

小朋友，呢個世界唔係男就係女
你有本事呢世唔好同任何女性接觸（除咗家人外）你就有資格唔批准你女朋友接觸異性～～
你既然唔放心，咪一齊岀席囉，做人大方d！
你作為男朋友，既然唔放心伴侶玩到咁夜 怕有危險，咪去接佢走囉！你又唔肯去接，喺到講咁多廢話有咩用？

[匿名]

第一點就覺得你唔啱啦，同事唔係男就女，唔出席冇得升職喎。

[匿名]

成年人凌晨自己返屋企有幾危險？小朋友係咪未試過玩到凌晨呀。 個約定最好笑，冇異性既活動唔準去😂 即係公司party, 應酬, 工幹一律唔比去。 唔講仲以為中學生出po

[匿名]

既然你係比較佔有慾強…你想解決你擔心嘅問題好簡單，同佢約定幾點完party同喺邊度完，佢完咗作為另一半嘅責任就係去接佢返屋企
好簡單，可以完成到你佔有慾嘅問題，又可以盡男朋友責任

[匿名]

你地個承諾都幾on9 😂 返工應酬同打好人事關係對自己職場有好大幫助，所以出席event係有必要，點解你唔係佢角度諗下呢？仲有，你擔心佢夜返屋企危險嘅你咪去接佢咯，一黎可以宣示主權 二黎又確保佢安全返到屋企。人係會變，當年你地細個唔識唸先會有個on9承諾，依家佢知道無可能，而佢會唔會被人溝係控制唔到，佢愛你就可以抵抗誘惑，係睇大家有幾信任對方姐，唔通真係禁室培慾咩

[匿名]

你想寫想佢去定唔佢去呀？9唔搭8
同埋你話佢係同異性單獨出街就話者，而家大班你都驚？咁即係你對佢對你既感情根本都無安全感，成日要怪對方，不如你放開自己既心態先啦，可以話你知就算你同佢分手，大部分既男女都一樣，因為呢啲叫正常社交呀，明未？

[匿名]

佢有心走你點捉都捉唔住架～ 俾啲信心

[匿名]

說真，如果你是40歲，揸幾層樓的古老石山，我覺得你有say

[匿名]

你哋個約定其實冇可能守得到㗎喎
返工唔應酬點做嘢

[匿名]

你又同異性玩，winwin雙贏，super🥳

[匿名]

以為係啲 control freak 港女先會咁諗，又黐身，又冇自信，24小時凈係黐住你好唔好？條女夜返屋企你咁擔心你唔識去接佢㗎咩？你咁唔想佢去 party 你叫佢辭職你養佢咪得囉，又冇本事又控制狂。

[匿名]

如果連呢樣都唔放心， 點行落去？ 唔放心咪去接佢囉

[匿名]

😐我以為係小學生出post