佢話去旅行食嘅野旺色都有得食

[匿名]

8年前中三嘅我哋相識、相遇、相知，當時嘅我地眼中只有愛情，只係知道大家深愛對方。嗰時我哋諗嘅未來好簡單，就係兩個人生活得開心幸福，大家都唔離開大家都得，但係當時冇諗過原來人大咗有咁多事要顧慮。

直到中學畢業，我地都好恩愛，我哋嘅愛情都冇煩惱。到左18歲嗰年，我考咗上大學，佢因為唔夠分就冇再讀書，搵咗一份餐廳工。我嘅屋企人一直都有經濟上支持我，而佢只係得萬幾蚊嘅人工都要分三分一俾屋企人，又要幫手交租。因為佢家姐生左個仔，佢屋企人嘅人工好多都係用咗佢落家姐到。

到咗20歲，我開始一邊翻學一邊翻pt，人工一個月都只係得$3000，我都會儲住，而佢份人工都冇加過。我識嘅人開始越嚟越多，有時同佢哋講下目標、夢想、拍拖，聽到佢哋個個都話「我想入xx公司做、我男朋友翻xx工、一個月俾幾錢我洗…」。我會係到諗，點解我男朋友仲係得萬幾蚊人工，每逢特別日子我都冇收過禮物，最多都係有張心意卡，而佢就收過我唔少禮物（唔係貴，每份都係$1000內），我覺得男仔都要有儀式感。同朋友嘅男朋友相比之下，我開始覺得自己男朋友好廢。

到咗畢業之後，我開始翻ft，人工都係$16000左右，而佢就開始失業，有時炒下散都係得$5-6000人工一個月。識落嘅朋友有時聚下舊都會問「你男朋友有冇揸車？佢最近買左xx車、佢又買咗xx牌子手袋俾我、宜家佢個個月供樓好好辛苦，但係最緊要住得開心…」，而我？我都仲係自己買手袋（$300-500），由上大學到宜家翻工都只係換過2次手袋，日日搭地鐵翻工。

我慢慢有想買樓嘅諗法，但係我宜家先儲得7-8萬，而男朋友人工低，又要俾家用同埋幫屋企人交租嘅關係，每個月都係月光族，到月尾都會清曬，有時唔夠洗仲會問我借少少。

最近我萌生嘅一個念頭，究竟係我對男朋友嘅要求高左，定係我將佢同其他人嘅男朋友比較先會有咁嘅諗法？宜家每次同佢鬧交都離唔開一個字「錢」。出街我哋一直都係AA，一個星期都只係出2日街，有時就會係屋企留下坐又唔洗洗錢。佢從來都唔會買禮物俾我，但係會帶我周圍去，例如：慶祝紀念日我哋會係海旁過、生日我哋會去睇日出等等。我都好想好似啲朋友咁，生日可以去staycation、大家為咗未來一齊奮鬥一齊供樓、有屬於自己嘅家庭。

我同男朋友一齊咁耐，我哋都冇進一步發展。我有嘗試過問佢不如搵份高人工啲嘅人一齊搬出去住，佢又話出面租咪又係要錢，不如搬去佢屋企住。但係佢屋企得1間房，佢想我同佢一齊瞓廳？佢唔介意我都介意啦。有時我會明示暗示佢話想去staycation、想生日收下禮物、放假有空閒錢想去旅行，兩個人AA都得。佢又會話我啲朋友好物質，同我周圍去下咪幾好，去旅行都係食下壽司、燒烤，旺角咪有得食。

依幾日係我最唔好開啲時候，佢又冇工開第3個月，佢洗我嘅、食我嘅、著我嘅，我好想同佢分手，因為我覺得佢好冇用，但係我講唔出口「分手」兩隻字。我有直接話過佢好廢、冇用，但係佢聽完就算，日日都無所事事。依幾日我一諗起將來，我就忍唔住喊出嚟，我已經睇唔到未來點樣同佢行，我對佢好似已經冇曬愛嘅感覺。

可能我真係變到越嚟越物質，不如鬧醒下我…

[匿名]

人比人比死人，對物質有追求唔係問題，但若你純粹係唔甘心身邊嘅人有而你無，就真係自己攞黎煩，唔好咁多比較，focus係你自己真正想要嘅野度。你同男朋友已經唔係一個世界嘅人，你有遙遠嘅理想同目標，但佢只想當下開心，甚至唔想賺錢，咁下去好難行

[匿名]

你地係校園既時候一齊行同一條路，所以唔會有咩問題出現。
·
但由你地中學畢業開始，已經係一條分岔路。
·
兩個人開始各自有自己既新圈子同環境，差距漸漸拉遠。
·
佢原地踏步，而你越行越遠。
———————————————
我唔係鼓勵你嚮往物質，相反虛榮心一定要趁依家剛踏入社會就控制好、防止日後成為奢侈品既奴隸。
·
個問題係依家既佢冇辦法滿足到依家既你，佢甚至唔明白你思想上同需求上既轉變。
·
一個23歲既男仔擁有既嘢係好有限，呢個係正常，財富都需要時間累積。
·
你需要考慮既係，佢值唔值得你等。
·
如果你決定等，就「食得鹹魚抵得渴」，唔好再抱怨、一齊努力。
·
如果你唔想等，就同對方講清楚好好道別、唔好拖住人地。

[匿名]

其實剩係最尾嗰段已經交代咗所有嘢
當然失業唔係個男仔本身想嘅
但係都已經第三個月 我諗有心嘅一定搵到工
但係佢keep住用個女仔啲錢
就算真係結得成婚
我都唔覺得可以有啲咩好日子
個男仔根本就係冇責任感
一齊咗咁多年 最好就有辦法點醒佢
如果唔係 就真係要諗下
你係咪想未來一直都包養佢啦

[匿名]

大家目標唔同！你想語得好啲，佢想得過且過，你仲年輕，放手搵過個啦

[匿名]

我都唔係一個物質嘅人，我基本上都好願意AA嘅，亦盡量唔會同身邊朋友比較
但係，我會希望對方最少會一直進步，大家可以一齊進步
所以我覺得係要分手，我ex以前就係令我有呢d
無將來嘅感覺，分手後都無後悔，大家步伐不一致，就唔好再勉強，浪費青春

[匿名]

雖然我唔建議你用朋友嘅男朋友黎比，
但佢真係太唔識得為將來打算，未試過失去你所以太冇危機感，過得一日得一日，你地步伐已經唔一致，你點佢唔醒嘅話最後其實都會分，人生得一次，唔好為一個唔上進嘅伴侶將就咁過

[匿名]

幫佢搵工或者哄佢讀返書讀, 重整返個人生咪可以一齊成長, 事在人為。

[匿名]

唔上進嘅人你跟住佢會好迷茫

[匿名]

男人可以冇錢、但唔可以連目標都冇💭😗

[匿名]

大家價值觀相差太遠，講多無謂⋯你盡快講分手，無謂浪費大家時間⋯
但講真，你知唔知自己打出來果d朋友野令人極反感，22-23歲女出文思考下先⋯又或者你真係好羨慕你d朋友有「家用」收⋯大佬，婚都未結拿人個仔錢來洗😂⋯真係好肉酸⋯
同埋其實你唔需要下下搵人來比較，你d朋友傾計開口埋口就係「男友買左XX車、送左咩手袋」⋯廿幾歲自己買架車代步都唔會同朋友咁樣曬啦⋯何況係「男友買」⋯男友搵的又有幾巴閉呀？佢地自己又有冇呀？ 😂
做人，尤其做女人，自己賺自己買至值得曬，靠人地就cheap 晒⋯ 唔通女人的成就係來自男人咩？可唔可以長進d 呀？😂
兩件事分開睇，即係不討論你班港女朋友及其有錢有成就的男友⋯其實你男友都離不開「冇上進心、不長進、安於現狀」幾味野，讀書未必係唯一出路，但佢廿歲仔冇學歷不特只，仲懶懶閑，比條女罵廢都仲傻下傻下⋯
講得出唔使去旅行，去旺角一樣食到好野⋯就知佢跟本泥一樣⋯你自問係上進的女仔，係有目標想買樓，你就唔應該痴埋呢pat泥度⋯佢只會拖累你⋯
旅行唔只係食野掛？去遠d睇多d 學習人地文化多d, 呢d叫增廣見聞，唔係去掃街，唔係去韓國街買完小食零食返屋企睇波食果種⋯
其實可能你後知後覺啦，跟本應該在你地一個讀書，一個唔再進修開始，大家就愈行愈遠⋯你只係遲鈍啫，要d 朋友出來曬命，你至從中睇到身邊果個的分別，至思考大家係咪唔夾⋯係呀，價值觀差距太大呀⋯
講分手未必就做衰人，只要你唔係騎牛搵馬咁搵完至講分手⋯你勸過佢上進但佢都唔改，未必係你貪錢，現實就係柴米油鹽，你要諗埋就算你宜家頂得佢順，第時都要養埋佢⋯三個月唔做野唔進修，呢種人似乎係食軟飯的材料⋯

[匿名]

自暴自棄嘅人未死到臨頭唔會轉彎

[匿名]

其實講話男女掉轉好正常呢一樣嘢好荒謬，睇你咁講，雖然你比較自己男朋友，同埋人哋男朋友好似唔係幾好，但係好明顯睇得出你男朋友係冇上進心，而你既然有買樓呢一個諗法就代表你應該都算係一個有上進心嘅女仔。你哋兩個嘅步伐已經唔同，唔好浪費你同埋浪費佢嘅時間。

[匿名]

唔係想話你男朋友好好，但你拎佢同你朋友啲frd 比較，對佢都好唔公平啫。你講到佢咁差，覺得自己夠條件咁分手搵過個咪得。

[匿名]

行得耐 現實咗係正常 但係都反映一個問題就係你唔夠包容同埋愛佢 就算佢冇上進心 就算佢廢 冇能力搵份好工 佢依然係佢 佢都將青春交咗落呢段關係 先嫌棄對方嘅都係唔夠愛對方

[匿名]

老實講 其實呢個post係小有寫得幾詳細又有反思意義嘅post，不過啲comment都係咁toxic