同佢friend到做唔到情侶

[匿名]

我地係讀書時期識，因為讀醫科，timetable有9成相似，仲要對足7年，大家好似中學時期嘅同班同學咁一星期見足幾日，加上住得近嘅關係成日都會約埋一齊返學。大家畢業之後又咁啱係同一醫院同一科，我係同佢做左同事之後先慢慢對佢有感覺，但因為我地已經frd左7年，唔係好知可以點樣先會發展到情侶。

Y1入學大家都有各自嘅伴侶，但都係因為唔同u而分開。我地兩個一開始就fd zone左大家，大家明確表示唔係對方嗰type。對我自己嚟講，因為中學比人bully過，好怕做人地嘅focus，唔中意比人議論，所以去到大學都自然唔會諗同同班同學一齊，因為會比好多人討論同埋散左就好尷尬。所以無論我對住邊個男仔，高矮肥瘦靚唔靚仔有冇錢性格好唔好都好，由第一次見面已經落閘唔考慮。

佢個人幾靚仔又識打扮，仲要讀醫科，識左佢咁耐不斷都有唔少女仔approach佢，不論大過佢細過佢定同年，但佢一直都話唔啱。佢以前嘅女朋友個個都好高質，靚女又識打扮。我自問唔係靚女，最多比人話係矮矮地可愛，都會打扮下但返學一般都懶得化妝，樣順眼但一定稱唔上靚女。

大家都單身左5年以上，大家一直以好朋友咁相處，約埋一齊返學放學，會一齊走堂去食野，分組練lab做gp project出實習都會一齊，有時得我地兩個有時會一班fd。

兩個人都單身之後，我地close左好多，但冇乜曖昧嘅野出現，只係keep住朋友關係。我地間唔時兩個人單獨放學會去行街睇衫，我地會互相幫大家揀衫，然後一齊搭車返屋企。有時係學校溫書溫得夜會一齊傾下心事，佢會讚下我好girlfriendable，成熟/好為人著想之類，讚我呢種性格係男仔會中意嘅性格。但我都會不以為言，因為對佢冇任何朋友以外嘅想法，所以都係聽完就算。我有問過佢點解一直唔搵女朋友，佢話搵唔到一個女仔係啱嘅。

至於點解我話frd到做唔到情侶，係因為我地平時當對方係bro/sis咁相處，由幾年前已經開始搭車就會話「借嚟挨下」就挨住佢個膊頭瞓，同對方睇衫嗰時有幫對方睇啱嘅衫會直接攞起拍落對方身上面，或者睇中左頂帽會直接放係我頭上面，又會講下中意女仔點樣點樣著。佢返pt嗰度買野有discount，我有好中意嘅公仔鎖匙扣想佢幫我買，佢買左之後直接話送比我，隔幾日見我冇掛隻鎖匙扣係袋就會好似小朋友扭計咁問我點解唔掛隻野係袋。🤣 有時放學/放工兩個人去掃街食小食，經常性兩個人share一份，餐具用同一份，貪方便上嚟會叫對方直接餵，成日買野飲都會交換試下對方嗰杯。大家中意嘅歌手都可以一樣，有時想睇演唱會冇fd陪就會叫對方一齊去睇。我地兩個係衣着、食野、興趣、性格、價值觀上都好似，仲要讀同一科，好多共同話題，好多野唔洗講出嚟大家嘅諗法都一致，小至我地去餐廳食飯揀野食冇傾過都會揀中雙方都想食嘅野，冇特登夾都會唔小心同對方dress code左，真係好神奇。

做左7年同學，我地之間嘅相處維持左幾年我都對佢冇愛情嗰種感覺。真正sense到自己中意佢，係大家一齊返工之後發生。我地而家做緊同一間醫院同一科，係醫院入面真係好大壓力，加上啱啱入職，面對住啲意外、傷亡、唔同病人嘅經歷，仲未可以淡然面對，好多時都會好心up好易有同理心。處理case時會有壓力，背負住嘅係一條生命，責任重大。好多時我地一齊傾計訴苦，佢每次都會好有耐心咁安慰我，陪我去食我中意嘅野氹返我開心。或者大家得閒會一齊吐下苦水，做對方嘅support。

而家嚟講識左9年，做左7年同學2年同事，中意左佢差唔多2年，但係佢面前一直都扮到對佢冇feel，好怕有少少野表露左就比佢sense到，段關係會返唔到轉頭。雖然以上嘅行為據我所知佢冇對其他女仔咁樣做，暫時都淨係同我咁close，但我依然唔認為我地有可能。呢兩年以嚟每次同佢相處都好開心又好唔開心，成日會幻想如果我地係couple咁相處會係幾開心。

至於點解我話我地兩個close到做唔到情侶，一嚟係大家一早frd zone左大家，就算做好多好close嘅野都唔會有咩諗法。到發現自己中意左佢，咩都依賴佢嘅時侯，我地兩個之間嘅相處方式已經維持左幾年，要改都改唔到。咁多年嚟我地都係咁close嘅相處，因為太fd太了解大家，轉變唔到做情侶呢種感覺，真係好心up好難受。就算我想追佢都唔知應該要點做，因為我地本身已經好close咁相處，我做咩佢都係當我係sis。二嚟係因為讀醫科nursing社工之類科目嘅人不論男女，性格普遍都係細心啲caring啲，識照顧人嗰種，所以我都唔會話因為佢對我比較關心就覺得佢對我有意思。三嚟係因為好多時佢有講過，咁樣做代表唔到啲咩，有啲野係正常社交，呢個世界唔係男就係女之類，比我感覺佢真係對我純好朋友咁。

Sorry for長文。講左咁多，一嚟係想知男仔嘅角度係點樣諗，佢係咪真係當我純朋友；二嚟係想知如果想同佢發展應該要點做。😞

[匿名]

一齊啦，咁都唔一齊我會好傷心
sorry 好似睇劇咁🙈

呢d 關係應該係破斧沉舟咁，開咗口就冇得返轉頭，你試下同佢講你最近想拍拖，其實心入面都有個對象，只係覺得做女仔唔好太主動，你睇下佢有咩反應囉，如果佢冇乜反應或者好鼓勵你主動去馬，咁應該真係對你冇feel

[匿名]

其實一對情侶拍拖拍耐左，都不過係做番你地兩個平時做緊嘅嘢

所謂「友達以上，戀人未滿」會做嘅事只係一個過左熱戀期好多情侶其實都係咁樣過😂😂

就咁睇字我都已經覺得你地兩個好夾好襯😂😂幸福自己爭取架，加油啦

[匿名]

唔試過，點知會唔會就係命中注定嘅天賜良緣？
當你一世人有八十歲命，佢已經佔咗你人生將近八分之一，既然係鍾意嘅點解唔鼓起勇氣向前行多一步？
幸福的確需要經營，但係唔爭取的話又點經營？
我相信你只係欠缺自信同勇氣，天時地利人和你全部佔曬，努力少少為自己爭取幸福啦。
怯，咁就一世㗎啦。

[匿名]

你心入面已經認為無可能…又點會真係有可能？
首先第一件事係要比d信心，覺得有可能先，至少叫有希望🤔
至於點發展，不如你試下叫佢同你互望20秒，你可以留意下佢嘅眼神…因為中意一個人嘅眼神係呃唔到人架（@@

[匿名]

既然咁friend，咪借啲意問吓佢有冇鍾意過你，試探完先決定下一步點做囉

如果你鍾意但一路無行動，就算佢鍾意你都好，一直得唔到回應嘅耐性都係好有限的，第日佢有其他女朋友嗰陣，自然一樣要疏遠你，然後你都係會無咗個好朋友

[匿名]

唔好驚無左俚個「朋友」
當你地各自有另一半
始早都會疏離
不如勇敢一次

[匿名]

其實都已經咁friend同friend 咗咁多年，就算衰咗都唔會冇朋友做嘅
Go ahead la~!!! 大把人 support 你哋🥳🥳

[匿名]

其實出去飲杯野，試下唔覺意拖下手，睇下會唔會有心跳感覺，有嘅就試下一齊，冇嘅就算

[匿名]

如果個男仔都對你有feel嘅，佢應該會一早去馬，而唔係做埋咁“親密”嘅野都唔表白。佢似真係當你係好好朋友，建議你識多幾個男仔發展下😂

[匿名]

如果冇表白到你會唔會後悔？如果會就試下講出來，叫佢如果冇可能做情侶希望可以繼續做朋友，只是想對自己ge感受誠實，搏盡無悔。不過咁嘅關係你地是但一個出pool都會完啦，如果想表白要趁早，唔好對唔住自己個心，加油！

[匿名]

唔好表白，好多野唔洗講岀口，尤其是係女仔。做一個比較親密既小舉動，例如好近距離咁比個眼神佢，揾機會錫下面珠燈，總之要係比平時更親密，catch him by surprise個種，如果對方有心就會get到，無心咪當tease下佢玩下，反正你地咁熟。但真係唔洗講到岀口。

[匿名]

有好多人支持你表白😂唔好信個d表白後做得返fd嘅言論，就算做得返fd，一定都唔會好似而家咁close，你對佢有感情嘅，被拒絕後點可能當乜事都無，對方又點可能明知你對佢有意思而當你普通朋友，表白如果失敗就要預左無左個fd。另外，對方唔係白紙毒L，你都唔係白紙，你對佢又有意思，如果佢對你都有意思嘅，一早就應該一齊左，你能夠一直都只係佢朋友唔能夠更進一步嘅，你自己諗下代表乜嘢，表白失敗率好高呀

[匿名]

我同我老公fd左10年，然後先一齊
作為過來人，如果您要表白就提起您既勇氣，然後加油
因為如果失敗，就可能會冇左個close friend

[匿名]

你所謂「當對方係bro/sis咁相處」既行為，連親生兄弟姐妹都未去到咁親密。
·
可能係你自己fd zone左佢，由頭FF到尾都未問過本人意見。
·
如果你連可能會失去呢個朋友既險都唔敢冒、連表白既勇氣都冇，有咩資格擁有佢？
·
問清楚佢，你起碼有個答案，知道日後點面對呢個人、唔再胡思亂想。
·
懦弱既人，係唔會被邱比特眷顧的。