慢熱既性格，係咪就得唔到愛情？

[匿名]

同呢個男仔識咗大概一個月左右就好似已經想確立關係 ，算係曖昧關係吧，雖然呢個男仔好細心對自己都好好傾計嘅過程都好開心，但就因為我自己個人本身比較慢熱，所以好似唔係好適應短時間之內咁熱情，最後選擇同佢講一番說話 ，內容大概係希望佢諗清楚或者係接觸多啲其他嘅人可能會發現我唔係太適合。

自從講了果番說話後，後來大家好一段時間都沒聯絡。然後兩個幾月前開始 大家好像有啲破冰，佢都會睇我ins的帖文和動態，跟住我自己又慢慢發現
原來好似唔係好放得低佢，開始會成日夢到佢，成日諗起佢。

後尾都有約出嚟食飯 雖然兩次都係我主動問。出嚟食飯，言談之間我都有解釋返其實之前嗰番說話唔係拒絕嘅意思，只係想佢諗清楚，都算係解釋咗個誤會。其實另一方面自己擔憂即係屋企人本身知道佢仲讀緊書唔太贊成，所以都係令到我其中一個無搵返佢嘅原因，但係屋企人呢個原因我當然就唔會同佢講。

雖然食飯都係開心嘅，傾計亦都唔會覺得尷尬，食完飯之後我哋都有傾陣計先告別。不過始終關係去唔返好似以前咁，因為佢平時唔會主動搵我傾計，對比起一開始嘅熱情真係差別好大。其實講真自己內心係真係好唔開心，每晚自己一個諗嘢嘅時候都會喊，我係度諗緊當時如果無講過番說話係咪唔會變到而家咁，問自己有無後悔講過呢番說話，同時都問自己應唔應該放棄。假設如果當時無講個番說話嘅話，而家嘅我哋會唔會係好開心咁一齊。

但係我自己會覺得，假設自己真係放唔低，而當時又係自己講呢番說話先，同時而家我又無其他鍾意嘅人，係咪可以繼續堅持多陣，到自己真係覺得攰嘅時候先放棄🥲 自己要做定心理準備，人哋唔一定接受返自己，而家可以做嘅就係盡量主動多一啲，同埋希望事情會往好方面發展，大家嘅關係會變好一點🥲

最近唸咗好多，係度唸點解佢會係我心裏面咁深刻。我本身係一個好慢熱，唔容易動情嘅人，可能因為自己好怕受傷害，安全感又好低。記得當時佢講過好多令我好心動嘅說話，佢知道我安全感好低，佢話介紹佢啲朋友俾我識，唔會令我受傷害，同朋友出去都會主動同我講，又會主動問我收工返到屋企未，呢啲雖然只係好細微嘅嘢，但就係我想要嘅嘢。記得第二次同佢見面，佢好細心帶多件衫怕我凍。而第二次見面佢都毫不介意將我個樣po去佢自己限時動態嗰度，講真我係真係好感動。可能就係因為佢對我做過好多好細微嘅嘢所以令到我記憶好深刻，而家就一直都會諗起佢。

其實而家諗返當時佢做咁多對自己咁好嘅嘢，而最後因為自己太慢熱，唔適應佢對自己咁好而講咗個番說話，而家不斷怪責自己當時講嘅嘢🥲心裏面一直覺得有後悔有遺憾。但假設我當時一直擺係心裏面唔講，一直接受佢對我嘅好，我又覺得咁樣對佢唔公平吧，所以當時我先會講。而家比較後悔嘅可能係，之後掛住佢但無即搵翻佢。而家嘅佢好冷漠，同一開始好大分別，夜晚自己一個諗起，會好唔開心，同時又會回憶翻之前同佢嘅對話🥹佢真係好好。雖然我啲朋友一直話佢會唔會係唔認真果啲，但係傾計對話我係知道佢，亦都感受佢嘅真誠，所以我無理朋友對佢嘅評價，我心裏面一直都覺得佢係認真嘅。

唉. 最近呢排一靜落嚟就會諗起
諗得多就會想喊，諗得多就會想鬧自己當初點解會咁衝動。說話講咗就係講咗，時間過去咗就係過去咗，而家呢一刻就係後悔同遺憾吧
每日都會諗自己可以做到啲咩，其實除咗主動多少少真係無🥺 而且對比起以往嘅我，我真係已經好勇敢地幾次主動踏出一步搵佢傾計，以前嘅我係一定唔會咁，因為我會好怕人哋拒絕 好多顧慮 。同時地主動都係要雙方，即使我主動而佢不為所動的話，其實都係無意思🥲

[匿名]

雖然我係女仔，但我聽過男仔講，佢地真係鼓起好大勇氣先會追一個女仔，當俾人拒絕嗰陣係好hurt😢代人佢嘅感受，唔好以為人地一定要好似韓劇咁死追唔放，其實你當時咁講已經係拒絕啦… 同埋你要分清楚，究竟你係慣左佢對你好、享受曖昧定你真係中意佢

[匿名]

慢熱唔係盾牌
對人地對自己都負責任
1就1 2就2慢熱唔係盾牌
對人地對自己都負責任
1就1 2就2

[匿名]

主動的人永遠比被動的人更容易找到真愛。
無論男女，冇人會想永遠都係自己主動、對方被動。

確認關係需要雙方既勇氣，結束曖昧、進入下一階段。
雙方同時能夠係對方面前展現出呢個勇氣，大家先有動力共同邁向新一步。

站在個男仔既角度，佢一直只係睇到你既拒絕同卻步。
本來就已經係試探階段（曖昧期），睇到你退後、佢自然唔想勉強你。

已經出左口既說話的確冇得收返，但更重要既係接下來你點做。
唔好覺得自己勇敢左一次就夠，做人係應該一日比一日勇敢。

如果你覺得呢個男仔值得，就拼盡全力爭取一次。
當你戰勝昨天既自己，你已經係你自己既英雄。

[匿名]

慢熱呢個字唔係俾你咁樣用架 佢當初既熱情，因為你叫佢諗清楚，而家佢真係聽你話諗清楚了。下次諗好先講出口。

[匿名]

你話嘅佢對你好呢啲只係好少野 諗清楚佢其實係咪想搵個人拍拖先搵你
其實事實上可能好多人都可以取代你
唔係嘅話佢點會咁容易放棄
仲要你解釋？
唔好自己內心太多戲

[匿名]

你應該好細個。幾個月貨仔嘅曖昧都要諗咁耐，過去左啦move on啦。btw 慢熱同拍唔拍得成拖無直接關係，你夠吸引人嘅，人地夠鍾意你嘅，你明言拒絕都趕唔走對方啦，佢唔夠愛你，試完發現你要追嫌麻煩所以放棄左，忘記佢啦下個更可愛

[匿名]

你已經比左紅燈signal人，佢會卻步唔想俾你感覺係死纏爛打，都係出於對你同自己嘅尊重。你呢個唔係慢熱，而係缺乏溝通技巧同勇氣，若你當初肯好好同佢講返自己嘅感受，可能佢都會樂意比多啲時間大家，而唔係結束呢段關係

[匿名]

係你叫人留意有其他人比你更加適合架嘛，轉個頭又後悔，野諗清楚先講啦

[匿名]

你嘅問題唔係慢熱 係扭扭擰擰

[匿名]

我直話直說難聽D講，你一開頭就勸退人人地梗係避開你啦，之後你見人哋唔理你又翻去講，人地會覺得咩？你吊高嚟賣lo 🌝

點知你係咪玩家呀？你比我都睇定D先啦🌝🌝

[匿名]

我覺得相對較難，我認為好多男仔可以同妳有曖昧關係，但時間一長左，就好希望可以同妳確立男女朋友既身份，但一直未有答案，男方會覺得冇機會，就會選擇放手。

[匿名]

我覺得相對較難，我認為好多男仔可以同妳有曖昧關係，但時間一長左，就好希望可以同妳確立男女朋友既身份，但一直未有答案，男方會覺得冇機會，就會選擇放手。

[匿名]

你講左呢番說話，佢會縮，証明佢唔夠堅定，其實你無錯，慢熱唔系罪，都系想保護自己，佢連禁樣都接受唔到。試問日後點同你相處？我明白呢刻你唔開心，但系佢唔會知，加油

[匿名]

如果佢真係够鍾意你，就唔會比嗰番説話嚇窒。

[匿名]

我覺得你首先要表明你對佢嘅態度 同佢講清楚你嗰陣時係點諗 同時你都要表明你想同佢發展落去 當然佢可能而家冷靜咗冇咗個時熱情因為佢已經經歷過兩個月心灰意冷傷心難過 你只可以慢慢暖番佢個心 令到雙方都變得主動啲 愛情要雙向 單向係冇愛情 如果唔係你到頭來都係得個吉 你唯有主動多啲關心佢愛佢 令到個愛情變番雙向

[匿名]

好明白你～初頭曖昧期我同我男朋友都講過類似嘅說話 因為自己冇自信 覺得唔會有人愛上自己而導致好難踏出嗰一步 但係佢都冇退後 反而比時間我慢慢去了解 過咗差唔多一個月我同佢就一齊左 其實可能個男仔都唔係真係非你不可啫 利申宜家聽返男朋友講佢話覺得我嗰陣玩到佢氹氹轉