佢晚晚撩鼻屎丟落我床後面

[匿名]

一齊咗差唔多一年，佢大我兩年，大家都係2字頭，係翻工識既。
佢好冇上進心，日日射波遲到，銀行存款係0，有時重要問呀媽拎錢，重會講大話係因為陪我冇曬錢，但我真係唔介意同男朋友AA，每次食飯我都同佢AA，或者我比全數。

有時重會洗大咗，糧尾得翻幾百蚊唔夠一千捱成個禮拜，所以每個月尾差唔多都係我比曬。。。試過糧尾又係得翻500蚊佢重約朋友出街食放題，我叫佢出糧先食啦，佢死都唔肯，最後都係去咗，我喊曬口問點解我咁辛苦同佢捱，佢唔珍惜，佢都係無動於衷。

最後得翻幾百蚊，佢就問呀媽借咗一千蚊，又同呀媽講話想同我食飯，我叫佢唔好再用我做藉口。以上呢啲問題已經日日嘈，完全解決唔到。
除咗呢件事，我最接受唔到就係佢好核突污糟，有時佢會過黎我屋企訓，我成日眼尾望到到佢隻手係塊面度郁，我一開始都以為佢係R痕，有時會望過去，佢就即刻放低隻手，後尾比我發現佢係撩鼻屎，重要掉落我床頭後面！真係勁嘔心。我覺得撩鼻個個都會，你唔可以去廁所撩曬洗完手先上床訓教？當我屋企係街邊咩。。我成家人都嚴重潔癖，我真係唔想再同佢一齊。

至於點解佢咁樣都重會一齊緊，係因為佢有情緒病自殺傾向，我同佢分手，佢一定會威脅我，我真係好驚，如果佢有乜事，我一定係千古罪人。再加上同事們雖然都知佢成日食軟飯，但大家都好可憐佢，佢對朋友同事性格幾好，幾有人緣，佢係公司扮到好慘，父母離異，單親家庭，又窮咁，大家成日同情佢有時重會請埋佢食飯。
我真係好想分手！！

[匿名]

撩鼻屎唔係問題，情緒勒索嚟食軟飯先係問題

[匿名]

銀行存款等如零～～

[匿名]

點解咁既男人都會有女朋友？🥲🥲🥲

[匿名]

分啦！有啲人屋企就無教佢衛生依樣嘢，唔一定男性女性都可能會，可能唔止鼻屎問題，可能鍾意用手撩牙，衫褲唔鍾意拎去洗，去完廁所唔洗手😂一係你同化一係就分手。

[匿名]

每個人都只能活一次，誰也不欠誰。
點解佢條命要你黎負責？
·
佢有病又唔係你害既，而且有病唔係大曬、更加唔代表可以理所當然地情緒勒索人地。
———————————————
我實在唔明白點解你咁在意同事點睇，為左其他人既目光而勉強自己、只會吃力不討好。
·
你咁年輕，呢份工相信唔會打死一世。
到你離開呢個公司果日，你同呢班人就毫無瓜葛。
—————————
你可憐佢又怕佢，佢就抓住你既弱點黎威脅同利用、務求達到自己既目的。
·
你有冇發現你地既情況已經唔係愛情，而係乞衣同路人既關係。
遇到乞衣，施捨係人情、無視係道理。
·
唔好咁輕易就被人道德綁架，搞到自己連分手都冇自由。

[匿名]

感受到你好驚同難過
佢吾會有事的，二十幾年都仲生勾勾企係度
妳值得擁有對妳好的幸福
但吾係佢
祝福妳，離開時有爭扎的話，記住要對得住自己，忠於自己，尊重愛情

[匿名]

但睇標題已經笑左😂

[匿名]

想分就分⋯
1）首先唔好再比佢上你屋企
2）你要分手初步同佢提左先，再通知佢屋企人，一定要通知，唔好怕唔好意思，叫佢睇住自己個仔
3）你亦可以同佢家人講出真相，所有錢銀問題一定唔可以食死貓，只要佢家人知道真相咁至幫到你「睇住自己個仔」
4）個波一定屬於佢家人，唔會屬於你，你放心，你宜家只係驚啫，我明白你，所以你要有個心理建設比自己，你自己要調整好自己先
5）如正式分手當日佢聲稱要做傻事，唔好猶豫，第一call佢家人，第二立即報警，報佢詳細地點，再知會其家人已報警
6）所以你宜家需要擇個日子（自己決定），取得佢家人聯絡方法。
流程就係咁⋯唔簡單ga, 但要做lo, 同埋你千祈唔好咁怕佢會做出咩事，你要有準備，但唔係怕到唔敢講，唔係怕到忘記自己要做d 咩（通知其家人跟手報警），你要不停練習⋯
同埋唔好被佢威脅出去搵佢，記住你自己都會有危險，唔好覺得「佢唔會傷害我」，佢可以係好人，但都可以臨場傷害到你⋯明就開始計劃⋯加油！

[匿名]

大家都係第一次做人 點解要讓佢🤬

[匿名]

可唔可以有相睇下床後面啲鼻屎堆成點🙏🏿唔該🙌🏾🙌🏾

[匿名]

扮慘扮到咁，情緒病會唔會都係扮返嚟？真正有自殺傾向嘅人唔會郁啲就攞呢樣嘢黎威脅你

[匿名]

見到個Title已經笑到仆街

[匿名]

下下情緒病唔分手，咁係咪一世都係咁

[匿名]

情緒勒索緊你喎，簡單黎講俾佢食住左。
不過你諗下如果佢之後話要同你結婚，如果唔係就死左去；
然後要你生仔，如果唔係就死左去；
之後要你大住肚出去搵埋食俾佢，如果唔係就死左去；
最後生左三件然後要同你離婚，如果唔得就又要死左去⋯⋯
咁你係咪都要做千古罪人㗎喎🤦‍♂️🤦‍♂️🤦‍♂️

[匿名]

疑似白卡喎 叫佢攞傷殘津貼啦