你衣食住行都係我比，連去偷食都用我既錢？

[匿名]

我對住你真係好大壓力。同你一齊嘅呢8年，我一直都要睇你面色做人，一直都做唔到自己。8年前遇到你，應該係我成世人最黑仔嘅一件事。

8年前，我哋識咗幾日就一齊咗，一齊咗唔夠半年，你就出軌，我哋頭幾年嘅感情就係不停分分合合。我自問個樣係正正常常，學校都有唔少人追，啲同學都讚我girlfriendable、容忍度高。其實有好多人都好過你， 但係我就係鍾意你。我以為自己付出多啲你就會明白我對你幾好，你之後就會對我好啲。原來，咁多年嚟唯一你嘅改變就係唔再出軌。

我哋一齊嘅頭4年你完全冇收入，連搵小三嘅錢都係拎我嘅。你冇錢搭車返屋企，我俾錢你旁身，點知你係問我拎車錢去搵個小三，仲要多多藉口，俾我發現咗，最後我心軟原諒你。依4年，我知你出軌都有十幾次，但係我隻眼開隻眼閉。連我啲同學send相俾我話你同小三出街，你都唔認，你全身啲衫褲鞋襪都係我買，我會唔知？仲係喺正我學校附近俾人影？你出軌我都仲忍到，你仲要俾我啲同學影到，你想我點？過咗幾年你冇再出軌，可能係某個小三點醒咗你啦。一齊嘅頭幾年嚟，我嘅零用錢同pt錢都同你一齊用，冇廿萬都十萬，我賺到幾多都用曬喺你身上，而你就係咁對我。

3年前，你搵到一份長工都有萬幾蚊，一做就做咗3年，人工都冇加過，仲要試過減到一個月得4千蚊。2年前，我一邊返pt，一邊讀書，一邊創業。我好多謝你呢一年嘅支持同責備我創業，好多謝你借過3萬俾我去創業，租金都同我一人一半，一年之後我好明顯係失敗咗，之後繼續踏踏實實返工pt同返學就算，但你仲不停咁話我晒錢話「都話你啦，創乜鬼業，晒錢」。

一年之後，我哋一齊搬咗出去住，我繼續讀上去master同返pt，屋企人定期都有俾錢我洗，平均連埋自己啲pt錢都有4-5萬一個月。而你已經冇再返工，日日都喺屋企hea。我日日放學放工返到屋企就係洗衫煮飯，而你仲瞓緊教。明明應承咗我會接我，但係10次先有1次。

你嘅衣食住行所有雜費都係我包曬，我明白啲錢唔係全部我賺返嚟，而係屋企人俾我一個人用嘅生活費，我呃佢哋話你仲有返工，仲同佢哋講你會同我一齊分擔，我個心都好唔舒服。我覺得要俾錢你洗都唔緊要，屋企人都預咗我會俾你洗，所以佢哋有講明最多俾幾多我，唔夠洗都唔會再俾，唔夠就自己返工搵。你仲要話我衰，話啲錢唔係我搵返嚟話我冇資格話你。Sorry？唔係我搵嘅又點？唔通啲錢係你嘅？宜家同你住咗半年，淨係半年就洗咗至少30萬，我仲要日日做妹仔受你氣。所有家務都係我做曬，你會話你都有做過，不過10隻手指都數得曬。明明應承咗搬出去住就會輪流做家務，但最後咪我做曬。仲有你病咗仲要特登傳染俾我，要我食你口水尾。好啦，過咗幾日我真係病咗，仲要嚴重過你，連續2日發燒都要返工，你就開開心心喺屋企瞓教同打機。我病都仲要煮飯洗碗俾你，我返工返到隻手已經攰到震曬，加埋我仲病緊，成個人都冇乜力，煮完飯仲要叫你起身食飯，叫完又唔起身。再過2個鐘先起身，我都諗住瞓教啦，你仲要我整返熱俾你食。我叫你食完洗返好，第二日我起身仲見到喺枱面，姐係又係我洗？

我叫你搵工又多多藉口，又話返咗幾年工想抖下，你想抖下，咁我呢？我明明可以攤大手板問屋企人攞錢日日喺屋企hea。就係因為你，我要返pt去賺你嘅生活費。你仲要成日都話我創業欠咗你好多錢，幾多？15萬？我養你咁多年都唔止15萬啦，我話還返俾你你又唔要，但係又成日都話我個人冇用，成日話我創業晒錢。

今日你又話想移民台灣，話物價平。Sorry，你移到咩？成26歲人啦，你銀行存款得4位數點移？旅行都去唔到啦，唔好咁幼稚啦，物價平又點？物價幾平都好，你連租屋嘅錢都冇，平又關唔關你事？你又話住台中台南都係幾千蚊租，求其搵份工都有。係吖，幾千蚊你會唔會住？你宜家住慣咗2萬蚊嘅屋你會唔會住幾千蚊嘅屋？俾你睇埋同宜家屋企生活環境差唔多嘅都唔止幾千蚊，你係都要嘈，話我抵毀台灣，之後又話我藍絲。大佬，我唔支持你冇錢走去台灣就話我藍絲？我真係冇野好講。好死唔死，你仲要同我講見到台灣搵份工有萬二蚊，仲話萬二蚊人工好高，仲話夠曬洗一個月。吖大佬，宜家一個月都洗4萬幾，你仲同我講萬二蚊喺台灣好高人工？夠你洗定夠我洗？

同你嘈完交我唔小心撞到個櫃，你唔係第一時間關心我，我都算，你第一時間係鬧我整跌啲野，你仲話我特登撞落去，仲要掉曬我書枱啲野落地，又拍枱，又大聲喝我。次次嘈交我想同你傾個問題，你係都唔肯傾，係都要我氹返你，每次都係我認錯，我真係好攰啦。我唔同你認錯，你就冷戰，啲問題積積埋埋令到我好辛苦好大壓力吖，我話想解決你又話我講廢話，我好驚我有一日會頂你唔順。其實喺依1年我已經唔係幾想同你一齊過，但係我可能係習慣咗有個人喺我身邊先同你一齊。

我知有啲人會話我有公主病，因為你成日話我有公主病。
如果當初我唔係識到你，我有公主病又點？我唔同你一齊咪有公主命囉，同你一齊咪妹仔命囉。

[匿名]

我好mean咁講
又要怨又要一齊 為乜
你覺得自己值得更好
就勇敢啲去追尋屬於自己嘅幸福

[匿名]

當你啱哂，佢錯哂，咁點？明知佢係人渣仲打咁大段野鬧佢，即係仲未睇得透，停止佢再傷害你嘅方式係唔需要再諗起佢

[匿名]

樓主好有錢（錯重點）

[匿名]

我果個去偷食果陣，都係我包接送，人地除佢既每一件都係我買，所以你要放下執念先可以放過自己

[匿名]

咁都唔走係你問題😂😂

[匿名]

淨係想知分咗手未

[匿名]

放手啦，就算分左手佢有冇後悔都好，都算啦，唔好咁執著佢點諗，最緊要係你唔會後悔，反而會好輕鬆
你知自己好，知佢差，做乜要為佢諗唔為自己諗下？
見到都覺得辛苦，原來抖音啲憨鳩劇情片現實中真係會發生

[匿名]

可能好多網友甚至你自己都唔明白點解佢咁渣，你都依然唔肯走。

其實你唔係真係咁「愛」佢，所以離唔開佢。
而係你地一齊半年果陣，你知道佢出軌，果種唔甘心既心態漸漸演變成一股執念。

呢股執念令你呢8年黎自欺欺人、自我感動，直到依家呢一刻

——————————————————

你地互相嫌棄、互相埋怨、互相傷害，但係又唔肯放手；明顯已經形成一種扭曲既關係，兩個人深陷其中、痛苦並享受著。

你唔自愛，自愛既人知道對方背叛果一刻就會當機立斷。
呢個就係你再委屈都冇人可憐你既原因。

你講曬出黎、發洩左，係一件好事。
但如果你繼續沈迷係呢個畸形既相處模式入面，冇人可以救到你。

[匿名]

佢唔走，真愛嚟到都無位坐
你自知有能力但任人踐踏
分分鐘你創業失敗都係因為有呢個潑你冷水嘅人喺度。btw 😂創業年半就判斷失敗，要守嫁，你啲錢洗晒佢度點守

[匿名]

條友明知條仔有問題 講咁多嘢都唔分手 條友都有問題

[匿名]

妳選擇一直縱容佢，仲要俾佢食拖鞋飯
結果就要自己suffer嘞
放手啦，施主

[匿名]

講咁多都唔分手，你又係搞笑既
已經嘥左8年，仲想咁樣到幾時？走啦，唔好再咁on居去同一個唔珍惜你既人一齊，如果唔係無人會再可憐你

[匿名]

其實點解要作賤自己先？
女仔們最應該愛果個係自己
你阿爸阿媽知道個女咁樣會好肉赤

[匿名]

唔明點解可以一齊8年 都知佢咁衰都仲唔分手 攞苦黎辛 你都有問題 接受唔到佢食軟飯 但你仲俾佢繼續食 女人青春好寶貴 搵過第個啦

[匿名]

如果你咁都叫公主病
佢咪係高牆上的超級王子病？😂
分手離開佢啦 you deserve better!