明明我地都有扑野，點解仲要搵PTGF？

[匿名]

我25 佢34 我地有個7歲既女

當年18歲意外有咗，同男朋友拍咗拖2年，諗住叫有感情基礎，所以就簽紙結婚，亦生左呀女出黎。當年以為自己算幾幸福，因為生左呀女我都有繼續讀書，起碼叫有張沙紙。

點知結左婚4年，我前前後後發現老公有搵PTGF，佢亦都認左。其實我真係好唔明，因為我地生咗呀女之後都有keep住有做，所以我諗唔係點解佢要出去搵PTGF。我問佢，佢話因為壓力太大，所以就出去搵。

爸爸雖然唔係神隊友，但起碼踢下都肯郁。而且轉工之後多左時間陪我地，星期六日都可以陪到我地出街行下玩下。所以頭一二三次我有原諒佢出去滾，因為我想比一個完整家庭比呀女成長。但我有講明，如果再有下一次，頭家就散。

我地經濟唔算好好，叫做有2餐溫飽。但佢再衰多範，鐘意賭錢，仲衰到賭外圍。最後輸左差唔多成五十萬，要找數既時候就問我借錢。我淨係借比十萬比佢，其餘我問銀行同財仔借，而家都仲還緊。

到左上個月，我覺得佢有啲奇怪所以係佢電話裝左GPS。有一晚約左佢屋企人食飯，點知佢就話唔黎，因為要做野。我見佢GPS跟本就唔係工作地點附近，所以我決定去會一會佢，睇下佢係咪又出去滾。出到去發現佢係酒店樓下食緊煙，即使我無見佢同女人一齊，我都好嬲好嬲，同佢講離婚。

佢喊哂同我講，佢同條女無做到，叫我唔好離婚。佢話佢比我鬧完就無再出去滾，佢話今次係出去同朋友食飯。

我當今次真係食飯，但我真係原諒唔到佢之前既所作所為，所以好想離婚。但唔知呀女點處理好，好驚同佢講完會有陰影。定係我應該繼續忍。

[匿名]

係酒店樓下食事後煙俾你周到都可以話冇扑 最慘係你選擇信 女人真係好擅長自己呃自己 唉

[匿名]

25歲咋你大把世界
快啲離婚改變人生

[匿名]

生仔真係要考牌
唔使出post問，都知道爛賭嘅嫁唔過，仲要借錢。。。

[匿名]

千祈唔好因為一時意氣離婚住，做大事要有部署。
結婚講感情，離婚就要講錢。

首先你要搵律師問清楚邊D欠債屬於「夫妻共同債務」，同埋離婚後會唔會所有借貸都變成你既個人債務。

另外，趁佢依家內疚，你要為自己同個囡爭取最大權益、保障日後既生活。
例如叫佢簽財產分配聲明，睇下你分到幾多錢、而佢自己承擔返賭債。

最好令佢日後唔會有能力搶到撫養權。
而你自己同時要有份工、確保要有穩定收入，先可以攞到撫養權。

——————————————————

個囡已經7歲，女仔早熟、佢比你想像中知道更多。
唔好覺得你勉強為左維持一個「完整既家」假象唔離婚，係為個囡好。

當初你太年輕睇錯人唔緊要，但小朋友係無辜；既然你已為人母，就要唸辦法好好保護個囡。

令個囡遠離一個爛賭又不忠於家庭既爸爸，先係真正保護緊佢。

只要給予足夠既愛同教導，單親家庭既小朋友一樣成長為一個明辨是非、自信又善良既人。

[匿名]

唔好同我講壓力大所以點點點，好似啲人壓力大所以偷拍裙底咁，全部都係比自己有個下台階既藉口，記住，你無錯，係佢一手搞散頭家，早走早著

[匿名]

個家庭一早已經唔完整啦 唔係與父母同住就叫完整家庭架 有d裂痕只係你唔願意俾你個女見到姐

[匿名]

唔好話佢滾丫，賭已經要離婚啦！你仲要幫佢還錢，還得幾多次？早走早着

[匿名]

離婚 個女大咗就會明

[匿名]

既然你都睇清楚呢個男人，何不狠心一點為自己打算？
25歲離婚，仲可能好容易搵到第二個真係錫你嘅男人
到你35先離婚，機會同選擇就會少好多
你甘心為咗呢個男人摧毀自己以後嘅人生咩？

[匿名]

冇斷正就話呃自己啫 斷正都唔離婚真係等過年呀？

[匿名]

離婚啦 你唔幸福仔女都唔會幸福

[匿名]

點解個男人咁唔要面都繼續三番四次偷食？你仲想幫佢喺個女面前保存佢顏面？雖然可能小朋友仲細，未係時候同佢講清楚，但你千祈唔好呃你個女，因為咁樣根本唔係保護佢。成年人就要對自己做過的事承擔責任，個男人做得出就要自己承擔返。

[匿名]

離婚，宜家唔係冇做，而係未做，佢會唔想做咩？

[匿名]

真係好唔鐘意有人會用唔想小朋友冇完整家庭做藉口而繼續同人渣一齊，你既然為小朋友👧🏻著想就更加應該離婚！

試想下你係佢，由細到大望住自己父母鬧交冇信任唔開心咁相處，係咁既環境之下成長先係最大既陰影！到大個之後就會唔相信婚姻💔

你如果堅決d反而係好榜樣，你要教識囡囡，做女人應該要獨立自主，堅強果斷，有底線有原則有要求，有選擇既權利，絕對唔會為垃圾呑聲忍氣！😤

重要既係，呢個人重要比唔到穩定既經濟你，要問你攞番錢轉頭💸。你好好地振作，揾份工，離開呢個渣男百利而無一害，加油🫶🏻

[匿名]

你個女見到自己老豆搞到老母喊先會有陰影，係呢種唔健康嘅家庭環境中成長係一定會有心理問題。你嘅包容只係縱容，佢根本唔識驚唔會對家庭負責。就算你離婚，都唔好旨意佢會定期比贍養費你