話佢大洗之後佢好堅持次次AA

[匿名]

一齊左半年，我地同年，但因為佢讀醫療科目嘅關係，佢遲我幾年畢業。佢仲讀緊書，而我就出左嚟做野。性格上冇乜大問題，唔會因為一個返學一個讀書令大家相處唔嚟，係佢比較固執，令到我唔係好識同佢相處。

佢屋企唔係有錢，住公屋，自從佢升左上大學就冇再問過屋企人攞零用。而我就返緊full time, 屋企都叫有啲錢，一年可以去4-5個旅行。佢除左讀書之外仲有返兩份工，一份係平日放學返，一份係假日返。但佢洗費好大，成日都會話自己冇錢，又話要帶嫲嫲睇醫生，又話幫細佬比補習費。基本上我地拍拖有九成都食茶記、掃街，因為佢話想洗少啲。每次想食貴少少、想食好啲，佢就會叫我請佢，因為佢冇錢。請左兩三次之後，我有一排真係糧尾，嗰排又多野煩，就成日有意無意咁話佢洗費好大，食貴野永遠都係我比錢，佢明明有返工都唔肯比返自己嗰份。但我只係嗰排講下呻下，嗰時都冇為意佢咁在意我講嘅說話。我係佢面前講左4-5次左右，可能講者無心聽者有意，佢覺得我係故意比說話佢聽，比佢一種感覺係佢欠左我咁。我同佢解釋我唔係咁嘅意思，我只係輕輕講下，唔知佢咁在意。佢仲要將之前每次我幫佢比左嘅錢全部比返一半我，（因為唔係好多次，佢好快就計曬、過埋比我）。

自此之後仲要每次都計住係一人一半，我話我可以請佢，佢都好堅決拒絕，話費事要我幫佢比完又不斷比說話佢聽，仲話幾百蚊一餐返多幾日工就搵得返。我真係冇咁嘅意思，但我點講佢都唔聽，淨係每次都好堅持要AA。我真係唔明咁少事佢點解咁大反應，仲要堅持到底，好有自己原則，我都唔知點同佢相處落去。

[匿名]

咁你真係比說話人聽吖嘛⋯

[匿名]

你話佢洗費大
我睇落d洗費原來唔係洗落自己到
佢知自己無錢食茶記掃街
你想食貴野 ，佢都誠實同你講佢無錢食
你唔想請未一齊食平野🤷🏼‍♀️
我真心覺得佢無錯
其實你有冇體諒過對方？

[匿名]

你覺得你係口賤？定係孤寒？唔准諗即刻答

[匿名]

講足四五次仲話輕輕講下，宜家好啦就你啦公平啦，又話唔知點解咁難相處
到底係邊個難相處？？？

[匿名]

俾說話人哋聽完又要扮晒大方想點？

[匿名]

起初佢當你係自己人，同你坦白經濟情況，以為你唔會介意。

結果你不但冇體諒心疼佢，反而有一種莫名既優越感同嫌棄。
——————————————————
講一次半次可能係無心，講4、5次就唔係巧合，對方好難唔記得。

你都講你已經正式出黎做嘢、有穩定收入，同得佢一齊就應該有心理準備經濟上要付出多D。
如果你做唔到，可以大大方方提出分手；但唔好一邊嫌棄人地一邊扮唔介意。

一個半工讀咁勤力既女仔肯定自尊心好強，聽完你咁講就決定數目要分明。
但呢個時候你又突然話佢分得太清。

唔好話個女仔，你自己可能都講唔出自己想點。

[匿名]

講咗4-5次都叫做講者無心聽者有意，唔係故意講俾佢聽？你返學校讀好啲書學下啲詞彙點用先啦😂😂

[匿名]

心入面不滿又要扮大方，人地AA又唔滿意。你都識講啦，請得幾次好快計到條數，但你講4、5次仲唔多？ 肉酸

[匿名]

肯AA又唔合樓主心意。好難明白，其實樓主你係想點？

[匿名]

強烈建議個女仔睇到呢個post要同個男仔講分手！

你係一個有責任心，努力，愛錫家人，孝順，有尊嚴嘅女仔
唔應該留係一個唔識愛惜你，尊重你，保護你，支持你嘅人身邊。

呢個男人自卑到自大，幼稚，諗嘢只考慮自己唔識企係你角度為你著想，斤斤計較，仲要明明心入面係介意，話完你又話自己唔係咁嘅意思，根本就係愛情廢柴，你留佢係你身邊只係浪費自己青春同心力。

你咁好嘅女仔唔應該浪費生命係呢種無用嘅男仔身上（佢係無L用嘅男仔，唔係好男人，好男人係有承擔，有責任感，比到支持你，為你著想，珍惜你保護你，愛你亦愛你屋企人，你辛苦你受委屈佢會心痛你，甚至為你抱不平為你出頭，而唔係比說話你聽仲要扮自己唔係咁嘅意思，令你受委屈，自尊心受損）

我好幸運男朋友係個好男人，100分嘅好男人，我講嘅好男人特質佢全部做到有餘。我未遇到佢之前都唔相信世上可以有咁好嘅男人，你唔離開廢柴就唔會遇到個好嘅，所以早走早著，快啲分手！

[匿名]

咁唔好食貴野囉，點解要食貴野呀？因為你要求？如果係嘅話，咁你有問題啦。你明知佢搵得唔多，都要去食貴野，咁你請都好正常，相反如果佢要求食貴野又要你請就係佢問題啦。同埋唔係佢洗費大，係佢屋企洗費大，你知佢幫細佬比錢，幫嫲嫲比錢，你知佢家境唔好，咁佢本身都應付唔到嘅話，點解仲要食貴野呢？
另外嗰句輕輕講下，睇到真係反白眼，輕輕講左4-5次 咁如果認真講係咪日日都要比說話佢聽呀？同埋唔係佢覺得你故意比說話佢聽呀，係你真係比說話佢聽呀，咩聽者有意，根本計講嗰個都有意啦，然後仲要開post話人固執，再係字裏行間不斷為自己講好說話，一個字 笑。
最後，宜家人地話要AA制你又唔鐘意，兩個字 港女。 祝你早日放手，令自己舒服啲。

[匿名]

通常話自己性格冇乜問題嗰啲，性格都係有問題

[匿名]

吓，你真係咁覺得佢係大洗，亦都真係講過好多次畀佢聽，咁如果你無咁嘅意思就唔會講啦！佢依家願意畀埋自己果份，你又唔鐘意，咁其實你係想點？不如你自己諗清楚到底係邊個矛盾緊先？

[匿名]

你想點L樣 😂😂又要話人大洗 ，你講到明食貴野永遠要你比錢 ，佢而家堅持AA 你又唔滿意，你好難服侍囉大爺😂😂 人地順哂你意 無再駛你錢啦 仲可以賴落相處問題 話唔知點同佢相處 ？ 你無咁既意思 ？但你言語上講到明就係咁既意思 😂😂你唔係咁既意思 麻煩你講得清清楚楚 唔好令人誤會 咁樣會玩死人 😂😂

[匿名]

講四五次都係輕輕講吓😦😦呢度人少少認咗佢啦。
你請又要呻，佢順你意唔AA又叫返人AA，今鋪真係龍門任你擺啊😮