希望妳會帶住罪惡感生活落去

[匿名]

我地嘅開始好純真，中五開始拍，所以我全程都好認真，但係你一次一次咁辜負我。

無論係你難頂嘅港女性格定係拜金價值觀我都可以忍，你一次又一次出軌，去到最後我選擇原諒你，但係你最後嘅態度真係會令我憎你一世，你果種邊個同你一齊都無所謂嘅態度，果一副高高在上嘅樣子，真係無法接受。

你第一次出軌，我嘅選擇係扮唔知，但係都有暗示你我知道所有嘢，件事嘅最後你因為同個男仔已經無咩機會見而結束左，但係我每次提起件事你都發我脾氣，反客為主，仲扮咩事都唔知，唔緊要我選擇原諒你，因為我覺得我地嗰陣仲細，值得比機會你。

去到之後你會開始同你d酒肉朋友出去飲酒，你開始成日呃我，仲攞d舊相放大cap圖sd比我當我on9咁呃，我的確好嬲，但係當我鬧你嘅時候你會話你已經無所謂，我知道如果我想繼續維繫呢段關係嘅話，唯一可以做嘅就係繼續忍住，所以我每次都選擇自己消化情緒，我開始越嚟越麻木。

去到我地一齊1年多d嘅時候，嗰陣我哋已經畢咗業，仲去你屋企嘅公司幫手，你意外大左肚，果陣嘅我地不知所措，不過我都好盡力咁去陪住你同埋理解你嘅不安，即使其實我可能仲驚過你，但係我知道我唔可以退縮，最後都係順利做咗手術。

當我以為我地已經經歷左好多嘢，無嘢可以再考驗我地嘅時候，你同我個best fd出左軌，你同我講話明明已經有過我bb我都唔信你，基於之前嘅經驗話比我知你地真係有嘢，反而係我覺得點解有過我bb之後你仲可以咁樣，你死都唔認，仲講左一大堆我唔夠努力我唔夠好之類嘅理由同我分手，我嗰陣時仲好天真咁樣係咁去改變自己，但係當我改變完嘅時候你地已經發展到要一齊嘅地步。

當時你仲呃曬我同埋你d fd，直到果日我送你上的士，你隔左一陣同我講你到左屋企，之後就無再覆過我，我就知道你要去搵佢，於是我就上的士去左佢屋企附近，果然我係的士上面已經見到你地2個拖住手翻屋企，我好嬲咁落車然後影低你地，sd比你某幾個fd睇，仲記得我係你地對面馬路行到你地到屋企為止，到宜家果一日嘅畫面仲歷歷在目。

之後嘅日子一d都唔好過，你仲好似以前咁反客為主，令我係你d fd面前變成罪人，明明我本身都同佢地係fd，你奪走左我所以嘅嘢，得翻一無所有嘅我係度，我知道自己賭輸左，我將所有嘢賭曬係你身上，最後得到嘅居然係咁樣嘅結果，我輸得一敗塗地。

你同我個fd一齊左4個月之後你地分左手，天真嘅我仲諗住追翻你，你都承認左係新鮮感，其實你我都一早知道，但係我都不計前嫌，用朋友嘅身份親近你，仲一直主動咁樣同你傾偈約你出嚟，一開始你都有理我，但係漸漸你又開始冷漠我，由呢一刻開始，我就知道你根本由始至終都冇所謂，只係得我一個人喺度維繫段關係。

有一日凌晨我搵你傾偈，你同我講話我哋冇可能再一齊返，同你爭拗左一輪之後，我決定放棄掙扎，果一日之後，你block左我WhatsApp，我亦都冇再搵過你，有一日我發夢夢見自己同你仲一齊緊，係個夢入面我哋好開心好sweet，好似以前嘅我同你，但係當我醒返之後發現呢個係夢，之後都有試過夢見你幾次，每當我夢醒嘅時候，就好似將我同你經歷過嘅嘢再經歷多一次咁，於是我決定block咗你ig，唔想再睇到有關你嘅一切。

直到今日，每當討論同拍拖有關嘅嘢，或者一啲價值觀，我就會諗起你，而且我嘅價值觀都完全崩壞左，失去左愛嘅能力，依家嘅我陌生到連自己都唔知自己真正嘅諗法，我呢一世都唔會唔記得係你成就左今日嘅我，我呢一世都會記得，曾經有個人俾咗我所有嘢，然後又攞走晒我所有嘢。

呢個就係我一世都忘記唔到嘅人，我嘅生命每1秒都俾你影響緊，你已經成為左我生命嘅一部分，請你帶着呢一份罪惡感同埋回憶。

[匿名]

究竟係咩力量，咁多頂綠帽都戴你唔醒？醒覺之後又要帶住恨意去寫呢篇文，你唔係覺得你寫完會舒服啲啊？唔識放低其實你咪one dog face☺️

[匿名]

啱啱都係一段類似嘅toxic relationship走緊出黎
雖然最後對方有道歉
但係都令我覺得自己好迷茫
所以好明白樓主感受
起碼你做得到block左佢呢樣嘢
已經足夠
一齊加油啦！

[匿名]

世上有兩種人：
1）犯左錯會內疚，儘量避免同樣事情發生。
2）犯左錯冇感覺，甚至唔覺得自己有錯。
·
你前女友係第二種。
佢根本唔覺得出軌有問題，因為你一次又一次原諒。
所以佢係唔會好似你想像中咁內疚或者記一世。
·
你所謂既「純真」係果個年紀既你，亦可能係當年既佢。
但人係會變，呢樣嘢你無法阻止。
——————————————————
至少依家你知道你個fd既人品唔得，亦知道呢個女仔唔係適合談婚論嫁既人。
呢兩個人消失，對你既人生只有好處。
·
你既戀愛經驗太少，所以先會覺得愛情世界得呢個人。
呢個世界冇話「冇左邊個就會死」，愛情亦唔係耕耘左就一定有收穫，只能愛一個、上一課。
·
現實D講句，你日後遇到其他女仔一樣可以心動。
甚麼「我已經失去愛人既能力」呢D唸法大家細個果陣都有過，事後只會覺得當時咁唸既自己好中二病。
——————————————————
比D時間好好沈澱一下自己，各方面提升自己、變成一個更好既人。
你應該散發魅力去吸引同頻道既人，而唔係卑微地祈求愛情。
·
你唔需要刻意去忘記呢個人，因為佢都係你過去既一部分。
歷史無法改變，但你可以改寫你既未來。
·
究竟係要成為悲劇主角，還是自己創造一個happy ending。
係你既選擇。

[匿名]

原來係個冇得再食軟飯上黎發爛炸既故事👏🏻

[匿名]

咩都忍咩都原諒唔係愛，係on9
Blame the victim都咁話

[匿名]

打面嘅post特別好睇 啪啪啪👏👏

[匿名]

你生活得比佢更加好，就係佢嘅報應。

[匿名]

呢個故仔有Potential出女方版，留名等睇

[匿名]

師兄，放下自在呀！佢唔會內疚!你都move on 啦！我未睇女版。但我想同你講-呢個世界who fking care 果個就赢。

[匿名]

佢影響左你一世，但對佢黎講你只係nothing

[匿名]

朋友 大家過來人 好明白你感受。
真係會失去愛既能力
唔夠膽再All in 落一個人到。

但首先你要愛自己🔥

[匿名]

唔，純真的你只因未被社會花花世界洗禮過，如果你一天學識玩的話，你會今天打到昨日的我，當然，我都希望你善良的心繼續。 只是自己拍拖經驗少些，也因你太後生的小朋友，愛情大過天是明白的，希望你捱過那諗法後，再和別人拍拖，或許你是要拍好幾次，你就會明白自己幾時會懂得照顧，也幾時會懂得取捨放手，你會明白當初口說只愛你一人，但原來人唔會愛死一個，沒有了就下一位，簡單直接。其實你愛人時，有無愛過自己？這個世上，誰可以照顧自己？只有你一人咋，如果因這生命中的過客去沉淪，那你口說的浪費就真的是浪費了，現在每一分一秒都好浪費。

[匿名]

條女咁垃圾都忍受到🥲
將來冇咩難得到你
亦都好難遇到一個更加衰
祝你幸福💪🏻