用左半個月整聖誕禮物俾佢，但我連一張卡都收唔到

[匿名]

Background: 我24男朋友大我一年，我哋一齊咗差唔多一年。我同佢都喺a0第一次拍拖，當時係佢追我嘅，但依段關係入面我成日都會好困惑。

① 一年入面雖然我哋之間好少嗌交。btw對方係一個唔會表達自己不滿同訴求嘅人，唔開心淨係會逃避or冷戰，好多嘢都要我估或者主動去問，佢都未必會想理我。我有同佢主動溝通過依件事同佢講話我希望如果你覺得唔開心有乜嘢可以同我講，唔一定喺講原因，就算喺講你依加唔開心都好，我可以俾空間你唔嘈你住，但最後佢嗯嗯哦哦，都喺當冇事發生。

② 我自問自己幾矮嘅得一五幾，唔係好靚但未至於到樣衰到唔想見人嗰種，身材都唔係好好。佢喺有做gym嘅，身材唔算差嗰種。佢追我嗰陣話我唔樣衰，佢唔睇樣唔睇身材，但一齊一段時間之後佢會經常貶低我。佢一開始話我肥先嘅，然後我就開始減肥，已經進行咗大概3個月瘦咗10kg左右，然後到後期就開始越嚟越過份 e.g. 你又矮又肥又樣衰、我唔想同你出去俾人話我女朋友好樣衰你可唔可以變可愛啲 etc。我有試過表達我唔開心but佢當無到依然繼續打擊我，令我對自己外表身材好焦慮。

③ 我係佢生日嘅時候送咗份禮物俾佢，今年聖誕都用咗半個月親手整咗個禮物俾佢。我本身唔喺想要佢買啲咩俾我，我淨係想要少少誠意，就算係一封手寫信都好，但我乜嘢都冇收過，淨係得一句聖誕快樂咩都冇。

佢做嘅依三點，我好困惑又好想解決，如果唔係我真係好辛苦。我身為女仔唔太理解男仔諗啲咩同點解會咁做，好想得到解答。

[匿名]

其實3個月減10kg 已經好叻

[匿名]

唔好委屈自己快啲分。一個唔尊重你嘅人對你黎講會好toxic, 減肥個度已經見到好大嘅負面影響。明白係你第一段感情可能唔易分，但咬緊牙關都要分，一步一步黎。
嘗試幫自己建立下自信？識得愛自己就會吸引尊重你嘅人番黎，加油

[匿名]

淨係睇第二點已經分得，唔洗理解😂

[匿名]

男仔選擇冷處理通常都係唔夠愛/唔夠成熟，呢兩樣是但一樣都好難改變，我係你就趁早分一分，只係一年佢已經咁冷淡，唔夾嘅人再相處落去都係消磨時間

[匿名]

就憑佢第二點，可以堅決分手

[匿名]

又貶低女仔開始呢d男人仲留黎過年😅

[匿名]

我逐個點黎分析：

1. 冷戰&唔願意溝通係拍拖既大忌，想有將來就一定要雙方肯溝通。
   遇到問題就冷處理、逃避，問題係唔會消失、只會堆積；積得太多，終有一日就會爆發、不歡而散。

2. 呢個世界冇完美，每個人都有老既一日。
   如果佢依家都嫌棄你外表呢樣果樣，日後老左有白頭髮有皺紋點算？
   冇人有資格可以貶低/嫌棄其他人，呢個係基本尊重。

3. 男仔唔似得女仔心思咁細密，但係呢個並不是無視你既心意、不懂感恩既理由。
   無論男女，見到對方為呢段關係付出都應該有一顆感恩回饋既心。

你冇錯，千祈唔好覺得佢講左D貶低你既說話打擊到你就等於係你既錯。
錯既人係佢，拍拖係應該平等相處，邊個都唔應該貶低邊個。

心意上既嘢唔好對男仔期望太高，因為佢哋好難get到女仔在意既點；你最多直接話佢知你想佢點做，睇下佢肯唔肯做。

你地雙方都係第一次拍拖，更加需要溝通交流、避免誤解。
但係一隻手掌拍唔響，一定要兩個人都願意主動、互相配合。

但若然你一而再再而三提出想溝通既情況下佢都拒絕，你都冇得勉強。

如果佢堅持唔肯改變……咁今次將會係你地各自係愛情中第一次撕心裂肺地成長。

[匿名]

唔知樓主咩身形咩樣啦，但佢追你前後講既野不一已經可以分手，要知道一定會有人鍾意真正既你，所以唔好怕分手，唔好一直受委屈

[匿名]

其實上得黎問多少都知係對方唔適合架啦，所以分啦

[匿名]

明白你依種困惑一直影響緊你嘅情緒，睇得出你好主動想解決你地之間嘅問題，但奈何佢唔多想理你
你係依段關係裏面嘅角色好卑微，對佢嚟講，你好似越嚟越襯唔起佢，佢開始對你厭倦，不斷用各種方法直接或間接推開你
其實已經好清楚，依三點可以用一句總結，佢已經唔愛你或者已經變咗心
你係個好用心嘅女仔，好欣賞你會去積極處理問題
希望你之後會過得更好，無咗佢，你嘅生活會開心好多呢

[匿名]

佢唔愛你亦唔在乎你感受，快啲分手

[匿名]

睇完只可以講⋯⋯
佢！唔！鍾！意！你！！！
分手吧～
留番D尊嚴俾自己
— 完 —

[匿名]

a0唔係借口，愛唔愛一個人，唔洗人地話你知先感受到。如果一個人真係愛一個人，包容係最基本。你做咩佢都覺平常可愛。但佢對你有噤多不滿，你應該已經明白，佢只係缺愛，唔係缺你。

[匿名]

第一佢個人溝通有問題，第二佢跟本唔識尊重人，第三佢拍拖淨係想有人陪下，冇諗過要付出d 咩野，好似為拍拖而拍拖咁🥹

[匿名]

唔會表達不滿同訴求，但就表達話你肥同唔夠可愛，到底係佢口多定你唔了解佢…? 🤔