同佢復合之後佢成個人變曬

[匿名]

同現任一齊左5年，大家同年，一齊大學畢業出嚟做左幾年野。佢性格好好，朋友都讚佢好girlfriendable，細心善良。我地都只係鬧過一兩次大交，唔會亂發脾氣，又唔會追求物質 ，紀念日簡簡單單食個飯就夠。

出嚟做野1年左右，我同佢提出分開。原因係我覺得同佢性格上唔夾。出左嚟做野之後因為day off唔同，或者day off都想留係屋企休息，可能10日先見到一次。佢會想我一個星期有一兩日可以傾吓電話，但我收工返到屋企都會想打機睇波，佢就怪我連傾10分鐘電話嘅時間都唔比佢。有時放工會同同事朋友食飯，佢就會怪我唔搵佢食，放左工想relax下都唔得，真係接受唔到。

我提出分手嗰日佢喊左成晚，不斷挽留，我聽到佢不斷喊不斷講會改真係好煩，最後我呼喝佢唔好再煩我，佢先靜左落嚟，自己返左屋企。

自從嗰日之後佢就完全消失左係我嘅世界咁，斷得一乾二淨。ig淨係del曬同我有關嘅post/story, 但就連少少放負嘅story都冇，連身邊嘅朋友都話見佢生活好開心周圍去玩，我唔講都唔知我地分左手。

嗰晚之後我係幾輕鬆，放左工冇人煩，放假打足全日機，但夜晚有時會諗起佢，會唔習慣身邊冇左佢，諗唔明點解佢可以完全唔搵我，分左手又好似少少唔開心都冇。慢慢開始好掛住佢，冇左個人係身邊會好唔自在。

曾經我身體有事住左一個月醫院，佢日日都嚟睇我，幫我抹身、打點一切，仲照顧埋我父母，等佢地老人家唔洗咁操勞，每次嚟探我都係女朋友專登由我屋企接我父母搭的士去醫院，探完我就陪佢地食飯再送返屋企先自己一個返屋企。佢每個星期都煲湯比我，陪我做運動，從未有過怨言。係分開左先睇到佢為我付出左好多。

有一晚突然好掛住佢，求其搵左個話題搵佢，佢淨係覆左我一句'’好‘’。我試過半夜打比佢，純粹想聽下佢把聲，佢就話，你冇野講我收線啦，我係電話入面喊曬咁講好掛住佢，同佢道歉係我以前冇體諒過佢。佢反而安慰返我轉頭話唔緊要，呢5年大家都有為呢段感情努力過，只係唔適合冇辦法再一齊走落去，佢唔會怪我。

嗰晚之後佢都冇再搵過我，我想約佢出嚟見面佢都拒絕我，我冇諗過佢咁絕情，因為佢都係一個好易氹容易心軟嘅人。到有一日去左佢公司樓下接佢。我想同佢食餐飯，佢都話要即刻返屋企。我想拖住佢行佢都甩開我隻手，仲鬧我已經分開左。我同佢道歉，問佢可唔可以同我一齊返，但佢都係拒絕。

嗰日之後我keep住一得閒就偷偷去接佢放工，帶佢食佢中意嘅餐廳，襯佢唔為意摸下佢頭咁。但只可以事前唔話佢知直接出現係佢面前。直至有一次我專登用藉口呃佢，帶左佢去睇佢想睇但買唔到飛嘅一場show，佢開心到傻，好耐冇見佢笑得咁滿足，我順勢就同佢表白，傾左好耐之後佢半推半就應承左我。

但復合之後嘅相處同以前有好大嘅改變，佢變得情緒化，成日都話會冇安全感，會怪我唔覆msg, 會話我唔報行蹤。明明以前唔會因為一啲小事去計較，而家佢好容易就喊。有一次我真係忍唔住，同佢嘈起上嚟，佢就話原來分開之後再一齊返係好難，佢對我嘅感情好似打左折咁，以前佢對我地段關係有信心。但佢話而家未可以對我、對呢段關係建立到信心，覺得我隨時會再次離開，我知自己有責任，咁我唯有慢慢陪佢建立返信心。

仲有就係我感覺佢冇以前咁依賴我，以前去睇戲佢話自己會凍，叫我帶多件外套，我會吐嘈佢麻煩又要怕凍自己又唔帶外套，但最後都會帶比佢。但而家佢出街會自己帶遮帶外套，仲專登同我講自己有攞外套唔洗幫佢帶。佢身體唔太好，每逢嚟m都會唔舒服，我得閒會煲下薑茶或者買杯熱飲比佢，但而家佢每次嚟m都會自己煲茶，出街唔舒服會自己買熱飲，自己比錢。以前佢會有事都想即刻同我分享，但而家佢好少搵我傾電話，就算傾都係得10-15分鐘就話有野做/要瞓教。以前佢一得閒就會問我見唔見，但佢而家就算我話得閒可以去搵佢佢都話唔洗，叫我打下機自己係屋企休息下。一齊出街有地方唔識去，以前佢會話叫我帶佢去，而家嘅佢自動搵曬方向路線，唔識行就睇google map，都唔會撒嬌叫我帶佢行。的確以前我有話過佢咩都靠我，覺得佢好煩，但而家佢咩都自己搞掂，有問題寧願搵朋友都唔搵我幫。我真係好心up。

另一個問題係佢唔肯公開我地段關係。我地以前間中會post下合照，復合之後我話過唔想咁快公開我地一齊返，因為面子問題，當初我好堅決講分開，我地有共識想公開先公開。但而家已經一齊返大半年，佢依然冇公開我，身邊嘅朋友都唔知佢有拍拖。但係我都已經有同身邊朋友講同返佢一齊，我唔明點解佢仲要收收埋埋。我同佢表達過一次我嘅不滿，佢只係話，大家一開始有共識想講先講，但佢而家仲未想講，佢覺得未對段感情恢復返信心，加上佢話佢冇要求過我要同人講一齊返呢件事，仲話返我而家係雙重標準。但我完全唔認為佢係扮單身搵第二個嘅人，一嚟佢會主動報備，手機任check, 二嚟係有男仔追佢，佢會堅決拒絕其他男仔嘅殷勤。究竟點先可以令佢快啲公開。

Sorry好長，而家呢刻我真係完全唔知佢想點，佢到底仲想唔想行落去。

[匿名]

其實呢，拍拖係要陪伴對方、關心對方，同埋令對方安心，報告行蹤係基本，你連時間心機都唔願意付出喺佢身上，咁你其實都唔係好愛佢。你呼喝佢果下，佢已經對你死心，佢好理智冇同你拖拖拉拉，但你又好似好有誠意同佢復合，結果一齊返但你平時個人都太自我而你不自知，你本質都改唔到，佢邊有信心同你行得遠

[匿名]

你不如放生佢啦😂
你條女喺你人生最艱難嘅時候任勞任怨又咁take care你
你呢？嫌人哋煩？你有冇資格呀？
而加又要怨人哋唔公開
你都幾難服侍架喎 你不如徹底反省下對過條女做過乜之後先再講啦

[匿名]

真係抵你有今日🤣自己當初咁絕情 咁好女仔都放棄堅決分手 人哋想一齊返 你仲喝人 到咗自己掛住人就搵反人 🤷🏻‍♀️你當條女係乜 想要就要 想分就分？人哋依賴你 係因為愛你 你就話人煩 好啦 到人哋獨立 乜都靠自己 你又話好up 🤷🏻‍♀️自己要面 講得唔好公開 你就咪L後悔啦 你到底想點hi樣🤣

[匿名]

人總係犯賤 對你好個時又吾識珍惜
女人一死心可以好決絕 你想佢變反以前甘係冇可能既事 你傷害過佢一次 佢對你已經失去信心

[匿名]

我覺得好心涼

以前同ex, 我就好似你gf 咁，對對方仲比自己好，但結果次次都係被分手

其中有個ex又係嫌我，到我搵到下一任先話等我返嚟，要同我結婚

我心諗我活得更好就係對佢最大嘅報復

[匿名]

你當日對人如何
現在你的下場定必如何

[匿名]

個女仔最錯係無好好堅持，選擇復合，因為復合後既畫面已經反映出你地之間係唔適合復合。 你最錯係不斷不斷用以前既佢去比較，咁你適合活在回憶。 建議: 放生個女仔，改好自己，好好對待你會遇到既下一位。

[匿名]

因為佢唔確定同你行唔行得耐，所以咪唔公開囉。你成個小朋友咁，乜都係以自己為中心，佢單身仲開心過湊仔。復合後嘅感情多數會再因為同一個原因分開

[匿名]

係你自己嘅任性令到另一半失去對你嘅信心
當信任呢啲嘢破壞左嘅時候係好難修補翻㗎
比著換個角度如果佢依家離開你然後佢又追番你你會唔會都驚佢再離開啊

[匿名]

女仔做得好 將你變得可有可無 亦唔公開 咁再失去既時候 都可以將傷害減到最低 要佢再對呢段感情有信心 一係你比以前對佢更加好 等佢覺得你仲可以有少少依賴性
性格不合 唔夾 磨合到既果5年都磨合曬啦 唔好因為覺得女仔對自己好好就死lur住人 真係對個女仔好 襯佢仲有青春放生佢搵過個啦 反正你得到後又會再次失去
你下邊條問題問尼都多餘

[匿名]

老實講如果女方只係為咗報仇，絕對支持👏👏

[匿名]

輸打贏要，人哋愛你嗰陣你又嫌佢煩，人哋唔愛你嗰陣你又覺得馨香，呢啲係犯賤，你唔係覺得自己冇問題掛？

[匿名]

不如放手 其實對你同佢都係好事~當一個女仔唔再依靠一個男仔 就代表佢已經冇以前咁愛你 佢係人 佢係有感情 當初你咁狠心飛咗佢 佢喊完果刻開始就已經下定決心對你死心 死左心就唔會再反轉頭