佢成日叫我跳出框框但我個框就係咁大

[匿名]

我同未婚妻都系23，我同佢系校外活動識，上年同佢求咗婚（下稱「未婚妻」）。我系住公屋，屋企人嘅收入都好低；而未婚妻系住私樓，獨生女，屋企人做生意。我哋中二嘅時候一齊，中三我誤入歧途，未婚妻當時都俾我影響咗成績差咗，但系佢中四嗰年就行返正途，直到宜家上埋大學，而我讀完中三就冇再讀書。最近我哋成日鬧交，因為未婚妻成日都話考慮將來。

「工作」：
我16歲嘅時候搵到份派傳單嘅工，但可惜做咗1個月就冇得做。之後有人搵我做倫敦金，當時因為呢份工鬧咗場交。佢覺得唔值得去搏，但我堅持要做，最後我見工嗰日遲到就冇請。到17嗰年我搵咗份11k嘅正職，一做就做咗接近5年，其間冇加過人工，我知系冇發展機會，但系安穩。而未婚妻有做過唔同工種：餐飲、補習、sales、freelance時裝model等等，佢覺得人就要不停向上爬。

「學歷」：
未婚妻宜家讀緊大學，英文水平都唔差；而我好早就冇讀書，英文連基本對答都應付唔到。未婚妻好想我學多門手藝，但系我連英文都唔識仲點學。佢話可以教我，但系我覺得好難。而專業方面，佢話如果系錢問題佢會幫我報，但系唔系錢嘅問題，系我冇興趣唔想學。

「屋企環境」：
我同未婚妻一直都好想搬出去住。我屋企系公屋，有3間房，大哥已經除咗名，二哥搬咗出去住但唔知有冇除名，但屋企人同我講我唔可以去抽。我有叫未婚妻搬去我屋企住，但系佢覺得生活環境唔好同埋同佢屋企距離好遠。未婚妻屋企我連上都未上過，因為佢屋企人都睇我屋企唔起，更加唔好講話搬去佢到住。

「租屋」：
我有提出過不如一齊租屋，但系我人工得11k，就算未婚妻有收入但一聽到系學生就唔租。加上，我平時仲要俾3k家用，計埋生活雜費其實唔系得返好多，就算一人一半租都儲唔到錢。

未婚妻一直都有屋企人嘅支持，屋企人仲有零用錢俾佢，加埋一直以嚟嘅收入同投資，宜家存款都有300k；而我都系得幾千。我明白我同佢嘅差距好大，但系我都唔想，我真系儲唔到錢。

「消費」：
一齊嘅第一年我哋系AA，之後我退咗學屋企人就冇再俾零用我，大部分嘅支出都系佢俾。到宜家我都有收入，去高級餐廳（人均$200-1000以上就佢俾曬，$200以下就我俾）。

一齊嘅頭3年我都冇正式送過禮物俾佢，可能有時喺街填問卷有個禮物仔就送佢俾，佢一直都唔知，收到都好開心。啱啱一齊佢會整手作俾我，到佢有返工就試過折銀紙花俾我，雖然得$500。到咗佢上大學，開始會買名牌衫褲鞋俾我（閒閒地都$4000)，我都系隨口講下佢就特別日子送。但系我有時都覺得好內疚。佢有同我暗示過想要啲咩，但系我負擔唔到，佢會同我講好失望。

「考車牌」：
佢一直都好想考車牌，唔想同人逼地鐵巴士，好想自己有架專屬車去邊都方便啲，但系我覺得女人揸車就系馬路炸彈。之後佢就逼我考車牌，我話連左右都唔識分，佢系都要我考，話平時佢屋企人車出車入好麻煩佢哋。佢有試過話如果我考到就送架車俾我，但我唔明搭車有咩唔好，我一直以嚟都系咁搭。

「結婚」：
我覺得簡簡單單去註冊就得，唔需要又擺酒又行禮，好似動物園表演咁俾人影嚟影去，而未婚妻覺得負擔唔到酒店婚禮就擺酒樓，酒樓擺唔到都至少要影婚紗相，但系我唔想，簡單就得。

「小朋友」：
我追求嘅系安安穩穩嘅生活，屋邨學校都唔系咁差。而未婚妻想小朋友讀啲好嘅學校，佢覺得我以前誤入歧途系因為我讀Band3學校。佢前2年已經搵定去邊間生BB，搵埋Playgroup、幼稚園邊間好，我覺得佢做多咗。其中佢想我學英文嘅原因都系因為小朋友，佢話入學試除咗睇小朋友能力，仲會睇埋家長。咁麻煩，不如你話自己單親啦。我覺得呢啲野都系睇緣份，就算有咗都仲有10個月時間去準備，宜家準備實在太早。

「置業」：
宜家香港樓價高企，平均啲新樓都600-700萬，邊有可能會上到車，我都幫唔到佢。佢話想嘗試同屋企人傾，如果我哋儲到多啲錢睇下有冇機會平賣/平租佢屋企人其中一個物業去俾我哋住，但系佢屋企人都睇唔起我，邊有可能會答應，所以我冇再同佢傾落去。

「性格」：
佢系一啲激進派，佢想要嘅嘢就會盡一切能力去得到。佢成日都逼我去搵高人工嘅人，但系咁耐都逼唔到就同我鬧交。佢覺得佢進步就要我同佢一齊進步，但佢唔明白我嘅能力唔許可，我都唔想。佢仲會覺得自己已經為咗我降低咗生活標準。平凡有咩唔好，點解一定要對自己咁高要求。對自己高要求唔緊要，點解要拉埋我落水。

我系好愛佢，但系我哋就系成日為咗依啲事而鬧交。佢會想同我傾但系根本就改變唔到。我知佢就系想我過高質素生活，但系我唔想。我唔想同佢傾但系佢就成日都提。根本就冇得傾，我同佢嘅諗法都唔同。邊有得妥協，你降低要求我都做唔到㗎。又話咩人要進步，跳出自己個框框。我個框就系咁大，唔會變。

其實我哋先20幾歲，活在當下咪幾好。我有次話不如你搵個有錢人咩都唔洗煩，佢又話佢愛嗰個系我，一齊計劃一齊進步，又話人生好短暫嘅廢話。

[匿名]

你唔值得擁有佢🤣

[匿名]

佢冇放棄你，但你似乎放棄咗自己。如果你冇打算/冇信心同人好好生活，你憑咩同人求婚

[匿名]

個女仔好慘🥲就禮物方面睇，個女仔付出咁多心機時間整禮物，換來嘅只係街邊贈品係咩事🥲

[匿名]

大約1分鐘之前

放過個女仔啦，唔係話個世界現實
你連自己都放棄自己，原地踏步固步自封既話，無人會幫到你，但你完全都唔想進步，做左5年都仲係11k都唔覺得有問題，11k最基本連自己都照顧唔到，住都成問題仲學咩人諗結婚生仔，請問你覺得11k可以比到咩既生活比對方同小朋友。

學歷低，經驗少唔緊要，可以去進修或學返門手藝，靠自己雙手努力總有出頭天，你應該感恩有個咁好既女朋友，你咁廢佢依然對你不離不棄仲想你進步

[匿名]

你唔好諗同女朋友點啦 份工做咗五年都係得11k 你諗吓自己之後點樣好過啦😅

[匿名]

文章結構好過啲有上嚟投訴/分享嘅讀書人（錯重點）

[匿名]

你咁無上進心又無錢，又要有面點得呀？你女朋友都無抱怨，你仲要嫌棄人地向上爬😃😢做人唔好比咁多藉口比自己啦😅

[匿名]

你點解同人求婚呢？
你都唔願意同對方同步，我諗人地女仔唔係要你大富大貴
只係同你想一齊努力，將來有安逸的生活環境…

你咁樣點叫人地父母放心交個女俾你呀，醒下啦哥哥仔