同現任一齊幾個月先發現自己有咗Ex既BB

[匿名]

第一次投稿，有啲長，希望大家俾意見我，好無助，唔知點算好🥲

今年23，啱啱畢業出嚟做緊第一份工。經期一直都唔穩定，幾個月先黎一次斷斷續續咁，之前都係靠睇醫生食催經藥先黎到。今年5月黎左一次之後又係一直黎唔到，咁自己都知咩事所以就冇理到佢，諗住遲啲先睇醫生。去到10月發現仲未有，就諗住去睇醫生攞藥食，嗰陣時醫生就話冇黎m有好多原因，咁之前自己都驗過血，知道係有少少多囊卵巢症嘅症狀，但醫生話多囊卵巢症係要照一次超聲波先知係咪。嗰陣時上網睇過通常呢啲醫生知道你用醫療卡就會叫你做好多檢查，所以最後冇照到就淨係攞咗藥就走。

到11月食左一個禮拜藥發現都冇反應，再等左半個月決定睇多次醫生，醫生話可以再開多次藥俾我。今次醫生冇再叫我做超聲波，但自己都想知究竟係咪多囊卵巢症令到我嚟唔到m，就自己同醫生講話想照一下超聲波。點知一照，佢話入面有個bb，仲要係好大個，已經超過三個月，醫生喺度俾我睇已經有手有腳，聽到嗰一刻真係個腦一片空白，同來冇諗過呢件事會發生係自己身上。醫生話如果上一次我肯照超聲波嘅話，嗰陣時個bb都仲係6週，可以直接喺診所做手術，但依家太大一定要入院生佢出嚟先得。

講返個背景先，依家係有男朋友嘅，但啱啱先同男朋友一齊左個幾月，所以我一聽到bb係三個月嘅時候就知一定唔係佢嘅。三個月前同個ex分左手，識左依家呢個男朋友，當時同個ex一齊仲有幾個月就散左，成段感情都好兒戲好似小朋友puppy love咁，所以就冇同到依家個男朋友講呢個ex嘅存在。依家呢個男朋友對我好好，好識照顧我，亦都好有責任心，feel到係有機會行到最後可以交托俾佢嘅人。

當知道呢件事之後，完全唔知同唔同男朋友講好，首先佢唔知我三個月前啱啱分手，再加上呢個bb唔係佢嘅，好驚佢會介意我身上好似有缺陷咁，而且始終感情基礎都仲未係好穩定。但係如果瞞住佢，對佢又好似好唔公平。有諗過有冇機會佢聽到之後，會話肯陪我渡過呢件事，但係我唔敢take呢個risk。更加唔知同唔同ex講好，分手嗰一刻已經斷絕晒一切聯繫，雖然之間有幾個共同朋友，但分手之後嘅關係都唔係處理得特別好。就算同左佢講，佢都唔會幫到我好多。

最後更加唔知點同屋企人講好，聽到嗰一刻有諗過可唔可以自己解決成件事，就算唔理金錢上嘅問題，但係又要入院，仲要手術後身體嘅調理都需要一段時間嘅休養。冇左屋企人嘅support，唔知自己可唔可以處理得到。但係屋企人唔知道我依家拍緊拖，更加唔知道ex嘅存在，我一直都係佢地心目中嘅乖乖女，突然聽到有左三個月肯定會好嬲。

我已經唔知點算，我知出post一定會俾人鬧咁細個就咁唔小心，落仔又好殘忍。但個ex都係第一次扑野，所以每一次佢都會好小心，完事之後都會check返個套有冇穿到。所以呢幾個月一直冇黎m根本唔會諗到係有左呢個可能性。而且本身自己月經都唔定期，可能有多囊卵巢症，醫生都講過懷孕機會有可能冇咁高。經過呢件事好後悔自己做所有嘢都咁遲，錯過晒所有最佳解決嘅時間。上網睇過好多資料，基本上超過12週好多醫生都未必會接呢個手術，好驚個肚越拖越大，到之後就更加影響身體。已經準備搵家計會，但都係要靠佢哋轉介去其他醫生。所以究竟我下一步應該點算好？呢件事應該同唔同佢哋講好？如果冇屋企人同男朋友嘅support，我自己可唔可以撐落去…

[匿名]

媽媽唔好唔要我😢

[匿名]

睇得出你好無助🫂
而家你要勇敢講出嚟要搵人support 你呀，如果正常屋企，一定會鬧咖啦，不過鬧完之後點都會為你著想、諗點幫你。
現任方面，等同屋企人傾好，件事處理好先同佢講啦。佢而家對你幾好都好，因為冇特別事發生嘛，又只係一齊咗3個月，你未必會見識倒佢面對困難或問題會有咩反應，你而家嘅心情未必處理得到。好好愛自己！

[匿名]

點解分咗手可以咁快同第二個一齊？好唔尊重、好兒戲。

[匿名]

首先你同現任講咗先，依個係你對佢嘅責任，再同屋企人講，嬲極有限，最後佢哋都會陪住你。

[匿名]

而家先3個月，想落嘅都仲落到

[匿名]

睇完頭兩大段，comment: 匪而所思😂
你住咩地方？大陸？如在香港或任何先進地區，邊有可能發生以上所講睇婦科醫生的經歷呀？

1. 咩通經藥，事實係避孕丸，其實可能好多人唔知避孕丸唔係得避孕一個作用，仲可以調理經期，咁我當po主冇仔細了解自己係食咩藥去調經，但d藥都唔可以叫「催經藥」下嘛？我都當係無知而講錯，唔再捉你呢一點⋯
2. 你今年5 月自然來經後就到10 月再睇醫生，其實普通科/婦科醫生係一定會要求你作基本驗孕至會開藥比你，呢點唔使有咩醫學知識都會知ga wo, 你又冇驗孕，又會有醫生肯開藥比你？一定冇可能、冇灰色地帶，因為真係冇可能⋯
3. 好啦，冇驗孕又食左藥調經都未來經，醫生會直接同你照內超聲波？
   大家可能唔知，因為照子宮超聲波可以在肚皮上照，即睇電視幫大肚婆在肚上照咁樣，但如po主所描述，佢係照卵巢，咁就係內超聲波，即用器材往體內超，下？？？
   如你懷孕，係會造成流產風險ga wo…
   組織下，10 月話調經醫生已冇即場驗孕，再到11月po主要求照卵巢希望確認是否多囊卵巢症，醫生又一次冇驗孕就直接超內超聲波？
   先後兩次診症都未有驗孕，第一次比左調經藥（避孕藥）po主食，第二次就照內超聲波⋯兩樣野都係醫療失誤之中的低級錯誤，十分大機會導致病人流產，或生出K 胎⋯
   仲要po主描述醫生話「如上次肯照超聲波，個胎只有6 週，當時可在診所做流產」⋯下下下？？？我睇左d咩？點樣診所做流產呀？

睇完呢兩大段後，我都幾肯定係作文⋯冇心機睇落去⋯

[匿名]

我唔明點解要生？因為殘忍？因為你有機會/肯定有多囊卵巢驚以後冇得生？但你有冇諗過你而家咁嘅情況生落嚟嘅對個BB更加殘忍！再加上因為驚以後冇得生，而你就為生而生，到最後咪又係個小朋友受罪🤦🏻‍♀️咁大個人，識林啦真係

[匿名]

相信你都唔會想生，你自己預備金錢啦，家計會要等好耐，你趕唔切架啦，得私家醫院你揀，有朋友既朋友去過，唔記得私家醫院係2萬幾蚊定4萬蚊
。
不過，你落就要預左有報應。將來記得行善積德回報番俾bb

[匿名]

一般黎講有「多囊卵巢綜合症」徵狀，婦科醫生都會建議儘快照超聲波；呢個係最直接可以睇到卵巢內部情況既方法，可以基本上確診。

至於醫生點解會第一時間建議你去做，係因為初期可以透過藥物或者飲食作息去控制、處理得好依然可以正常受孕；但如果拖得耐唔理，到左後期可以導致不育、甚至身體各方面都會受到影響。

你一開始以小人之心度君子之腹，所以無視左呢個咁重要既建議。

——————————————————

你現任係無辜、bb都係無辜，但你同前男友唔係。

事已至此，後悔係冇用。
既然係你闖出黎既禍，就要自己唸辦法。

既然你覺得呢件事無法獨自處理，就肯定要向屋企人坦白；即使佢地知道左會嬲，但佢地唔會害你、只會唸辦法幫你。

至於現任，你可以選擇坦白或者瞞騙，但兩條路都有代價。
唔好同我講你唔想揀，每個人都要為自己既行為負責。

[匿名]

如果父母平時唔係完全唔理你/好差嘅話，我覺得可以同屋企人講，始終你係佢親生骨肉，佢哋點都會陪住你走過呢段路.. 最多講你幾句 表示失望 但最後陪你嘅只有屋企人 （身邊有朋友都試過、佢媽咪好失望唔理佢，然後過幾日都係振作陪佢面對 陪佢調理身體）

[匿名]

仍然你驚講出來嘅後果，但係唔講出黎嘅後果更嚴重。我覺得首先要同你男朋友坦白返，不過最重要係講出自己感受，講出自己擔心同需要、自己想唔想生個小朋友出來 etc。如果你男朋友係愛你，無論點都好都會陪住你，不過出錢幫你養仔就應該未必，因為我覺得佢經濟能力都冇預生 B，而且可能仲讀緊大學？ 第2就係雖然屋企人一開始會鬧你，但鬧完最後都會愛你，你落嘅話都會出錢幫你，生出來都會幫手照顧~ 見到咁可愛嘅 BB 出世，大家都會被溶化。當然你都要背上俾佢一個點樣嘅童年嘅責任。遲講早講都係要講，自己心理準備下，然後再一次過坦白。時間對大家都好公平，你唔處理，時間都係會推進，直到最後紙包唔住火的

[匿名]

你冷靜搞清楚幾樣野先，1）你今世想唔想做媽媽(唔理爸爸係乜人都好)，你要知道，自己懷孕機會唔高，有可能呢個已經係你呢世人最後一個bb，你要諗清楚自己想唔想要bb。2）已經超過3個月，家計會都幫你唔到，如果決定唔要，你只可以考慮其他方法，你自己有無工作有無錢？無嘅其實得一個方法，同屋企人坦白，拿拿聲問佢哋攞錢去揾其他合法而安全嘅方法終止懷孕，唔好再拖，再拖分分鐘連安全嘅方法都無得你選擇。3）男朋友都無得呃架啦，如果你好彩見肚前搞得掂，可能有機會俾你呃到佢嘅，但你要諗清楚，你呃佢，等如埋個炸彈係身邊，遲早有一日會爆，而家先拍左3個月，要爆不如早d爆，無謂搞幾年講結婚個陣先黎爆。4）你都23，唔細架啦，今次結果點都好，唔該唔好再傷害自己俾男人無套好嗎，女人無套/計安全期/體外etc，其實近乎等如備孕，要有好大可能會有bb嘅心理準備先好咁做，要做又唔要bb，一係就要男方做足安全措施，一係就女方食藥，大個啦阿女，搞到要落b咁傷身，最痛唔係你個兩個幾個月貨仔嘅男朋友，而係陪住你23年嘅父母呀。

[匿名]

我覺得你唔係會畀人鬧咁細個就咁唔小心，而係畀人鬧你，唔好用虛假嗰一面對身邊嘅人，我覺得做人要敢做敢認，你冇畀男朋友知個ex嘅存在，同埋你話你係屋企人心目中，一直都係乖乖女，咁即係其實你都冇用最真實嗰面對住佢哋，對住最親近嘅人，淨係畀佢哋睇到你好嗰面係冇意思，你咁樣只會令佢哋更加失望

[匿名]

落，唔係嘅話你係害左佢，要養大一個小朋友一d都唔易

[匿名]

真心嘅，同依家男朋友講，
佢接受到係你好彩，接受唔到係十分十分正常，
個小朋友一定就唔要得㗎啦，
你係真係錯得好撚離譜，
咁耐冇嚟m，就算你不嬲斷斷續續都好，
驗一驗求個安心點都要，醫生叫你照又唔照，
呢個週數，香港係落唔到，
你去家計會佢會叫社工勸你生出嚟俾人領養，
一定要同屋企人講，
你一個人去處理呢啲事情會情緒崩潰，
即使俾屋企人鬧到仆街都要講，
同屋企人商量下可以點處理。