攬佢唔夠三秒，就推開我話夠啦

[匿名]

先講下背景，我哋都係23歲，同居咗接近兩年，一齊咗4年。

平時佢對我都幾好，外人講嘅同居會容易有嘅問題我哋都冇事，頂多係有時唔肯洗碗拖地呢啲，日日都過得幾安穩，得閒就一齊打機睇netflix，或者會計劃出去玩，忙嗰排就一齊工作（有一間共用書房），仲一齊養咗2隻貓。
一齊咁多年，頭嗰年佢都冇乜表示抗拒肢體接觸（順帶一提第一年內已經做咗），我時不時就想攬下，可能因為第一年未同居？嗰陣見面嘅時候每次話攬我哋都係正常情侶攬咁。

開始同居後，日日都見，我真係經過就想攬下咁，但認真做嘢嘅時候絕對唔會騷擾佢，淨係佢玩緊手機或者睇緊片先會，同埋出門前/返嚟後都會想攬下。而家每次攬，佢都係唔夠3秒就輕力推開我話「夠啦」，我問點解唔可以攬耐啲佢就反問攬咁耐做乜，我唔主動攬嘅，佢都唔會主動。
錫都係，我唔主動，佢都唔會，而且佢好少用言語表達愛意，本來我覺得冇乜嘢，因為佢行為上都好照顧我，例如會有閒錢會買小禮物俾我、會同我計劃出去玩、會煮野食俾我等等，但因為佢言語又冇、肢體接觸都冇，我有啲好似心理唔平衡咁。

唔係想怪佢，我係真心想問咁樣係咪冇問題？身邊朋友嘅男朋友連whatsapp都可以話想攬/kiss或者係話掛住對方，我同男朋友幾乎係我唔主動就冇，但係床上又冇呢個問題。

特別係平日見佢好錫兩隻貓，成日想抱佢哋錫佢哋，我總感覺佢只係唔想攬/錫我而唔係唔中意呢個行為本身咁🥲
矛盾嘅係無可能因為咁就否定晒佢愛唔愛我，我係感受到佢愛嘅，係唔係因為我太需要肢體接觸先會覺得佢俾得特別少？

順帶一提，我同佢嘅拍拖模式唔係嗰種女仔可以好任性嗰種貌似現代盛行嘅模式（我唔知），係類似大男人小女人咁，但係合理嗰隻，因為我性格本來都比較軟，其他情況下相處都冇乜問題，淨係呢樣嘢🥲女朋友希望男朋友攬自己多啲，但男朋友話唔中意，我係咪應該退讓？

[匿名]

21歲已經有自己地方住，真係令人羨慕🥲

[匿名]

唔想攬唔想錫好大機會係已經唔鐘意🙁

[匿名]

時差唔多入直路試下推開佢,同佢講：夠啦,做住咁多先。

[匿名]

好有問題，同佢好好傾下大家嘅問題。😶

[匿名]

每個人嘅love language 唔同啫～

[匿名]

除左呢樣野，其他生活上同床上都冇問題既話，又唔會係唔愛既。以你地既拍拖模式來講，試下拒絕你個陣嗲下佢：「我想抱多陣😗」

聽你同佢既相處，平時好似好顧慮佢感受，善解人意係好事，但女人有時太懂事會令男人覺得你有d野係唔需要、唔在意，小任性會令男人知道你都係有要求既人，會珍惜你多d，尤其你同居，會愈來愈冇新鮮感，事事順從並唔係好事，愛自己多d🫶🏻祝福你😘

[匿名]

我差d 以為係自己寫嘅，樓主you are not alone😂有d 男仔係咁，但情況都叫有d 改善，如果樓主唔介意可以pm 我，我可以分享多d 💪🏻

[匿名]

奇怪…如果你地既相處模式係偏向「大男人小女人」，佢應該會享受/中意你呢D撒嬌既行為至啱。

不過呢個年紀黎講，你地各自都算做得好好了。

可能佢只係唔明白女仔中意有更多肢體上既互動黎聯繫感情姐，你可以等佢得閒果陣話佢知。

任何事情都係，只要搵到一個大家都可以接受既做法、達成共識就冇問題。

好好珍惜呢個男仔，佢算係難得既一個年輕人。

[匿名]

其實我覺得又冇甘偏激既 睇留言多數係一係吾愛 一係冇感情😓

老老實實 同居已經日日見 吾通仲要whatsapp你 好掛住你咩🥲。你想攬佢吾想攬。其實會吾會係熱戀期過左咋。一齊耐左就會對另一半開始自在。好多表面野吾使做就心照啦。你講佢大男人性格 甘吾攬我又覺得合理渦。 不過你真係好在意 就同佢傾下囉。表達下你既諗法甘囉 😊

[匿名]

我覺得冇乜問題喎

[匿名]

可能一齊得耐就唔想 因為我會係咁 但唔代表唔愛 而且人點同貓比🥴

[匿名]

有一種可能…佢會唔會試緊自己到底鍾唔鍾意女人？ 所以同你一齊。但最後身體都好抗拒同異性接觸🫢🤔🤔

[匿名]

覺得唔夠資訊比建議

[匿名]

有冇聽過愛之語？攬唔攬都冇對錯，係大家表達愛既方式唔同姐。
你可以搵男朋友認真傾下，講出你既需求，解釋原因，希望佢可以配合你理解你。

[匿名]

我同我男友同居2年都係咁🤣🤣佢都吾會主動錫我or攬我，除非嗌完交或發完脾氣，係sd msg會錫下
但我覺得我地冇乜問題，佢一樣係到照顧我，照顧埋貓，把口係到話我，隻手係到晾衫，一樣吾會講啲好聽既野
順帶一提我23歲同男友同居（即係大你2年🤣），冇你諗得咁多，不過佢好直接同我講佢愛一個人係用行動黎表示，吾係得把口講完就算
不過我冇你性格咁小女人，該講就講，該鬧就鬧，至少比佢知道我諗乜
有時你吾講佢吾知你想點，吾知你地有冇溝通過，你都要話比佢知你既需求