鐘意左佢先發現，其實一直唔了解佢

[匿名]

我地都系讀工程嘅，不過佢系DSE直入，我系讀完asso先入返yr2。因為佢年頭我年尾，所以只系大過佢半年。但其實睇樣我仲細過佢，試過一齊去玩嘅時候比人以為系佢細妹。

當時第一堂我怕自己追唔上大學進度，所以走左去第一排坐，就系咁識到佢。可能因為工程本身就少女仔讀，所以佢都冇講咩，介紹埋我識佢其他朋友，理所當然就入左佢嘅朋友圈子。

由識佢第一日開始就感覺到佢系一個學霸，識人又多，只系一直都冇見佢同其他女仔特別親。佢曾經講過全世界女死曬都唔會揀我，我一開始都只系諗住同佢做朋友，所以當其他人講笑話我地似拍緊拖，我都系笑下就算。

中間我一個細過我成年嘅工程系男仔拍過拖，佢亦都同過一個其他系嘅女仔差D一齊左。佢同我私底下講過，只系因為個女仔要去留學，佢唔想異地戀，所以先冇應承左個女仔。

由細到大我都莫名其妙地好抗拒同其他人親密接觸，最多只可以擁抱，我同前任亦因為咁無辦法更進一步。前任急於想進一步，做左D好過分嘅事，我地因此而分手。而佢系唯一一個知道曬成件事嘅異性朋友。佢喺聽曬成件事之後，沉默左幾分鐘，就好似無聽過咁。

直到我地畢業嘅時候，我睇住佢同其他女仔朋友影畢業相，個心有種好唔舒服嘅感覺。就喺果個時候，我發現自己鍾意左佢。

畢業之後第一年撞正武廢，我地齊齊畢業變失業。因為其他朋友都陸續搵到工，我地順理成章私底下多左約出嚟。我開始觀察佢嘅習慣同愛好，但佢始終滴水不漏。除左一D佢其他朋友都知嘅習慣同喜好，我咩都睇唔出。甚至連佢點睇我，我都睇唔穿。。佢唔會po我地嘅相，甚至連我tag佢嘅限時都唔會repost。有一次見到佢po同其他女仔嘅合照，我忍唔住問佢點解唔repost我嘅story，佢先話原來我前任有follow 佢，怕我前任誤會。我一時諗唔到有咩理由反駁，於是件事就不了了之。

失業大半年之後，我同屋企人商量過，決定去歐洲讀master。而佢都終於搵到份正職，人工比正常畢業生高少少，所以決定留喺香港做野。當時我本身有諗住冒住冇左個朋友嘅風險同佢表白，但諗起佢話過唔想異地戀，最後連送機果日都冇比佢同其他朋友嚟。

就畢業嘅時候，我喺讀書嘅地方搵到份工，決定同幾個同學合租。正當我諗住再做一年野拎工作經驗之後就返香港搵佢，佢就同成班朋友講佢申請左加拿大個救生艇計劃，預備離開香港移民過去。

我知道左之後，喺同佢傾計嘅時候有同佢講過想申請簽證，出年就去佢個城市。點知佢叫我唔好盲目跟，諗真自己想行邊條路先。最後我諗過現實問題，都系決定留翻喺歐洲，仲申請埋當地嘅工作簽證。

佢啱啱去到加拿大嘅時候，都仲會同我有野傾，但佢之後搵到當地嘅工，開始識到新朋友，我地嘅對話愈嚟愈少。每次睇住佢po同其他女仔出去食飯嘅相，我都好想同老細請假然後飛過去搵佢。不過知道全部都只系普通朋友之後，我心情又會即刻好返曬。

呢兩個月終於搞掂曬新入職嘅事，打開佢嘅ig睇翻佢近幾個月po嘅野，先發現佢同我印象中嘅形象完全唔同，諗緊佢系咪移民後改變左喜好。我問起佢幾時突然有咁嘅愛好，佢話一直都有。一直以來我都以為我只系識一個表面嘅佢，原來我同佢識左咁多年都一直唔熟佢。我開始懷疑我當初系真系鍾意佢，定只系鍾意佢嘅表面形象。

正當我開始糾結呢個問題嘅時候，有個共同朋友走嚟問我同佢系咪異地戀終於捱唔住分左手。我先知道原來佢之所以移民前都再冇其他女仔去到朋友以上，系因為即使佢冇po同我有關嘅野，佢其他朋友都以為我地系一對。我一邊愧疚斷左佢嘅姻緣，一邊慶幸因為咁所以佢先到依加仲系單身。但我唔好講佢點諗，連我自己點諗都唔清楚。

早兩日我send左個一個講玩開戀愛遊戲男仔睇唔透現實世界女仔點諗嘅post比佢，同佢講我玩得太多戀愛遊戲，睇唔透現實男仔點諗。佢話其實男仔鍾意一個人好易睇，仲反問我當時點知前任鍾意自己。我老實話佢知當時我都系被人表白先知，仲問佢要點睇男仔點諗。佢答左句憑感覺之後就已讀不回我。

到投稿呢一秒我都睇唔透到底佢點諗，連投其所好都做唔到。而我自己問心都答唔出系咪真系鍾意佢，成個人都好混亂。
希望網友們可以打救下我，指條明路比我知應該點行落去。

[匿名]

我淨係知佢唔鍾意你

[匿名]

一篇亂諗幾年嘢嘅心路歷程

[匿名]

1. 唔理邊個大過邊個先，有冇人解答到我⋯一個年頭出世，一個年尾出世，點會只差半年ge?
   我只諗到如一個2000 年12 月出生，一個2001年1月出世，大家只差一個月😂⋯我真係好想知點計⋯
2. 其實係咪你自己諗多左呀？我只睇到佢對朋友唔太講自己感受，有機會係在香港時同學間都冇玩開佢中意ge野，而佢又唔係太需要別人認同的人，所以冇咩講自己有咩愛好，到移民後可能終於搵到志同道合的朋友，咁咪po下相出來lo…簡單講當年在港時佢搵唔到知心朋友，到宜家人大左終於遇到d 有共同愛好的朋友咁解啫⋯
3. 男仔其實大多數係行動型，如果遇到自己中意的女仔就會衝，會怕自己唔夠快個女仔就比人追左，尤其大學時期的男仔如果係中意你，其實好快就會比你知道⋯如果相反就⋯He’s just not that into you…唔難明掛？
4. 人地咁多年冇拍拖，你有冇諗過其他原因？其他唔關你事的原因wo…點解只係當年大家close d 你就要代入佢唔拍拖的原因係因為你？咁我問你丫，一個人中意你又點收藏個心意呢？ 佢會連望你的眼神都唔一樣ga wo…咁點解咁多年到佢移埋民，佢的生命中都冇你呢？ 你反反覆覆咁唔明白佢究竟係咪中意你，其實有咩意思啫⋯就算佢中意過你又點？你眼前冇值得你珍惜的人？點解要不停回想當年？
5. 根據經驗⋯佢好大機會係中意男仔，只係當年仲細未確定，亦冇朋友可以傾訴，所以一直收埋，雖然我只係睇你文字描述，但真係好似⋯我有朋友畢業十年至公開自己中意男仔，讀書時佢怕冇人同佢玩，而且自己又未踏出一步去試，所以好疑惑⋯到出來做野多年後識左唔同的朋友，佢至確認到自己係點⋯但都冇話同好多人講，係我一直鼓勵佢唔係異類，佢係有權同家人講，搵返自己，找尋自己的幸福⋯我覺得你朋友8成似⋯

[匿名]

面對面問對方一句「你係咪中意我」真係咁難咩？
點解當初要浪費時間估黎估去，估到大家依家分隔異地見面都難。

簡單黎講，你唔夠中意佢，佢亦唔夠中意你。
所以先會成為無疾而終既曖昧。

既然你地各自都唔主動，勉強落去冇咩意思。
雙方都唔夠決心係冇可能戰勝異地戀。

有D嘢係時候放低。

[匿名]

乜你哋有戀過咩？得你單戀佢之嘛。就咁睇佢唔鍾意你喎。

[匿名]

唔覺得佢鍾意你，唔好諗咁多，各有各生活咪幾好

[匿名]

唔單止你睇唔明佢想點，我都睇唔明你想點。你考試咩寫甘長

[匿名]

依你所講既，我覺得佢無中意過你，純粹當你係朋友

[匿名]

成日都要加一句我睇落去細過/成熟過嘅意義係邊。

[匿名]

諗太多啦，講完

[匿名]

異地戀而唔開始係好事，而且男仔會理性去考慮。but睇完成篇野真心唔覺佢對你有過乜意思😂

[匿名]

你寫咁長有鬼用咩，你直接問佢講清楚仲好啦，係度浪費咁多時間精力有意思嗎。同埋睇唔出佢有中意過你，出去識多幾個男仔啦

[匿名]

搵其他人啦 如果個男仔鍾意你 唔會忍咁耐 唔表白 捨得你白等咁耐 都唔係啲咩珍惜你嘅人～放手啦 仲細 大把選擇嘅～🥹🥹

[匿名]

真係鍾意就一個月內approach左啦，拖咁多年浪費時間好咩？

[匿名]

時間從來唔代表所有，就算識咗好多年，都唔等如真正了解大家，現實講，其實好多嘢係表面，有時候只係自己將別人理想化，又或者係對方一直塑造緊一個你以為嘅人設🤨
你心入面已經有答案👍🏻