每日拍拖都好似教緊細路咁

[匿名]

講少少背景先，我同男朋友都就快30，而我係我男朋友嘅初戀
我男朋友係一個冇乜朋友又唔係好識同人相處嘅人，因為家庭背景底下令佢細細個已經冇乜機會學點同人相處。

佢依家係嗰啲喺朋友圈子講完一句野然後全場會Dead air，有時甚至冇人會明佢講乜嘅人
佢待人接物嘅技巧真係好差好差，除咗屋企人同埋識咗佢好耐嘅同學，其他人都唔係幾想同佢相處。

佢十次有九次去買野，都會俾Sales反白眼，因為佢問啲問題太難明或者係人哋答完佢都要問返差唔多嘅野，唔熟佢嘅人就會覺得佢係咄咄逼人。

而我偏偏係一個好重視禮貌，好重視社交技巧嘅人
依家每次拍拖都好似重新教一個小朋友待人接物咁，提佢要同人講唔該多謝呢啲基本野，又好似做翻譯機咁解釋人哋講緊咩/佢想問啲咩
但有時佢又會嬲，因為佢覺得自己同其他人相處到只係慢少少，但我一提或者一做翻譯機佢就覺得係我唔信佢做到。

事先聲明，我係愛佢嘅，亦都冇諗過要為咗呢樣野而分手，只係教佢教到有啲攰，想請教下各位有冇咩方法可以令我冇咁攰又或者可以令佢明白喺社會生存就係要學識呢啲社交技巧呢？

[匿名]

呢d成人有特殊需要，睇治療師啦。

[匿名]

有啲想知樓主男朋友當初係點樣開口表白😦

[匿名]

你想教佢就係咁攰，依啲要佢自己去經歷先會學到。

[匿名]

佢會唔會係有ADHD，如果真係愛佢就嘗試接受佢，夾硬要改變佢，只會令到兩個人都好攰

[匿名]

男仔好多時都比較遲熟，唔似得女仔咁早就意識到要搞什麼人際關係。

你係一心想幫佢，但每個人都有自己必須走過既路，先會成長。

而成長，係需要放手。
比佢親身去經歷，跌跌碰碰先會明白好多道理。

———————————————

你既角色係女朋友。
唔好搶住做一個嚴肅既導師，只會吃力不討好。

男人都有自尊，想被崇拜、被認同。
所以比起嫌棄既語氣，鼓勵同誇獎會有用好多。

你應該放手等佢自己去摸索，每當有進步就即時表現出你既讚許。

伴侶伴侶，係應該係旁邊陪佢一齊向前行，而唔係扯住佢行。

[匿名]

不如試下接受 一系就離開 我地自閉症人士好慶幸有你呢個咁有耐性嘅女友 但系我地都好難改變 由其是大A去到30歲咩都固化哂仲難 除非發生左啲令佢好衝擊嘅嘢啦

[匿名]

我老公同投稿者男朋友一樣，所以我會好明白感受，但佢地有個優點就係結左婚會係一個顧家男，以家庭為重大過一切，唯一唔同我老公以前拍過幾次拖，佢會有經驗知道想搵咩女人結婚，我同你一樣有時教到好攰力不從心感覺，所以對待佢地本人要好高IQ同EQ，要反思維方式同佢生活相處，因為佢地性格問題會遇到好多利用佢或者睇唔起既同事，有時佢地會轉左牛角尖，要係呢啲時候蚊返佢出嚟，教佢處事待人擔當一個心理導師，會辛苦啲，但俾多啲時間教佢地會有成果，加油💪🏻

[匿名]

別人的兒子別人教，你冇資格亦冇能力幫人教仔，但少女們通常唔信ga, 母愛氾濫，以為可以導化一個男人，可以「教好」一個成年男子⋯

1. 首先，聽人勸的唔需要你教，一個人年幼時需要家教，成長期會從跟人相處而學懂禮貌，從而形成一個人的品格德行。
   人地冇家教啫，但咁多年人讀書有老師教，跟同學相處有朋輩教ga ma, 如佢係個正常人的話，到你識佢時會咁樣？
2. 唔聽人勸的冇得教，唔好以為你可以用耐性同愛去感化一個人，宜家佢係人品有問題，唔係咩更新人士，永遠唔好以為自己可以改變一個人，你只能改變自己心態去接受，唔合理？接受唔到？即係唔夾lo, 三觀不合、勉強冇幸福！
3. 其實連基本禮貌都冇⋯我勸你走啦⋯你想教仔第時自己生左仔教，人地個仔牛龜咁大使你教？佢價值觀已定⋯你點「教」？
   同埋呢唔好猜測佢有咩自閉症，或者症至會咁⋯就算真係又點？我問你，你又做到咩野？你可能遷就到幾時？可以「教」到幾時？

[匿名]

其實點解要教同點解cm 話要分？我唔明。
多啲帶佢岀去社交，你唔好岀聲，等佢自己講，快過你交，社會大學永遠都係學嘢最快學嘢最多嘅地方

[匿名]

其實佢應該係有自閉症之類嘅病，所以係溝通上先會有咁嘅問題，幾廿年前唔會有咁多人aware呢啲病，你唔可以用一個正常人諗嘢模式去諗佢，其實佢自己都唔想

[匿名]

其實有可能佢係有自閉症但自己唔知😢可能係亞斯伯格或者高功能自閉症，冇智力問題但有溝通障礙。好多人都係成年後先確診，因為以前社會對SEN認識唔多。（我23歲確診，yt見過外國7老80先確診

[匿名]

睇哂都係唔知重點係邊，咁除咗溝通同表達上，佢究竟有咩問題？你哋都一齊左一段時間，你由day1開始都知佢係咁嫁啦，一早接受左，仲煩啲咩？都成30歲，要識一早都識啦，你愛佢就要接受以後都會係咁，唔係咪走囉

[匿名]

佢自己覺得冇問題就由佢，問吓自己會唔會多事咗？你男朋友自己覺得冇問題就冇問題，唔係個個人都真係需要朋友，佢自己覺得舒服就無謂逼佢，佢自己受教就話，唔係嘅話兩個都辛苦

[匿名]

佢係咪有自閉/亞氏保加？佢30歲人都唔識待人接物，已經唔可以怪係佢屋企人嘅問題，似係佢本身有問題wor。既然係咁，你點解仲同佢一齊？真係愛佢唔想放棄嘅，你只可以接受佢同慢慢教化，但要徹底改變佢真係無可能

[匿名]

其實唔洗點樣教， 由得佢自己出去撞板， 當佢知道痛過一刻就會有所改變。