送我搭巴士返屋企，一上車就瞓到落車

[匿名]

介紹一下背景佢30 O3，我28 O1。大家都有穩定工作收入。
同佢一齊左3個月，一開大家都係有好感，加埋我覺得自己年紀都有咁上下，唔想浪費時間想試下一齊，咁就開始左。因為之前冇拍過拖所以有好多嘢我都唔知點做，就算一齊左我都覺得對方同我好似普通朋友咁。係會日日chat 得閒食下飯咁。但係我成日響度唸我地咁樣係咪正常，究竟我係咪真係鍾意而同佢一齊。

不過有樣嘢我都幾肯定我唔鍾意佢成日提住佢付出左幾多，e.g.佢會話「 我成日送你返屋企我係咪好好？」「我送xxx俾你好唔好？」「我收工好攰都同你食飯我係咪好好？」。

雖然佢真係差唔多次次都送我到屋企樓下，但係其實我真心覺得大家住得唔係近可以送上巴士就算。大家可能覺得送我返屋企響巴士度咪可以相處耐d lor，but現實係佢一上車唔夠兩分鐘就開始訓覺。到落車叫醒佢，跟住到我送佢去巴士站，仲間傾兩句但係都係d廢話，咁樣其實真係唔送好過。呢個問題我有同佢講過但係佢都係要堅持送，真係唔知佢唸乜

另外佢成日提送嘢俾我但係10次有9次都係講下就算。其實我覺得如果唔係真係送可以唔好提，因為你提完又唔送呢個落差感真係好難頂。但係我又唔可以直接同佢講你講完又唔送我唔開心，咁樣搞到我好似好恨要咁，事實上我係唔想佢令我有咁多無謂嘅期待感。

到食飯果度佢講到好似我唔攰唔洗返工咁，有次我忍唔住窒佢「我收工都好攰咁辛苦不如唔好食啦？」跟住佢話「我仲要送你返屋企窩」我聽到果下真係嬲左，好想講其實你可以唔洗送。但係我知講完就會去翻上面果度無限loop。講來都嘥氣。

其實呢d問題我都有同佢提過下，但係佢好似完全get唔到我講緊咩。而我又唔知點表達得完美d。搞到我覺得好煩。而引發我想分手嘅點係聖誕節一開始好期待同佢一齊過，佢都有話要見，但係我地冇講邊日，咁我就理所當然以為24號佢會同我倒數，因為佢果日放假。所以當佢同我講佢24號約左fd，我地26 or 27先見果陣，我覺得同我嘅預期相差好大，所以我好唔開心。宜家個腦不停唸緊我地係咪唔夾，好多嘢都溝通唔到咁，我究竟係咪應該要放手，唔好糾纏落去。但係咁小事分手我又唔捨得，另一方面，咁小事我想分手其實係咪代表我唔夠鍾意佢？究竟我應該點做

ps：其實我都知好明顯係溝通出現問題，但係我唔知點可以改善到，直接講我又驚佢唔開心，究竟我可以點做/講，求各位指點迷津！

sor for 199999

[匿名]

30 歲黎講佢言行都偏向幼稚，同埋佢有幾次拍拖經驗，應該要有能力lead 住一個冇乜拍拖經驗嘅人要係點維繫關係，但佢好似仲未開竅，反而講d 野做d 野好令人炆憎，雖然佢算係努力，但捉錯哂用神

我覺得你地唔係好適合，你28歲覺得自己年紀咁上下，即係你係想搵人結婚，佢30歲但個人都仲未夠成熟穩重，你再繼續落去都唔見得佢可以有咩改善，其實分手就係小事累積得多造成大失望，加上你覺得自己年紀大就自然有d 焦躁、迷茫。如果你地都想一齊，你仲願意俾時間去磨合，就要雙方加倍努力去了解對方同做好溝通，加油

[匿名]

睇完成篇野總算知道你點解28歲前都係A0

[匿名]

唔計送禮物單野 咁問你係咪佢好好果時 其實佢係咪想你讚佢 嗲下佢呀？
有時男朋友都好似湊仔咁咋

[匿名]

大家都溝通得唔清唔楚，不如直接講你嘅諗法。
你唔鍾意佢嘅態度就直接講、佢問你想唔想要咩禮物就清楚同佢講要定唔要、諗住一齊出街就約實日子，冇人知你想幾時出街。

[匿名]

撇開年齡黎分析會比較公平。

你第一次拍拖，唔識點做好正常。
建議唔好對愛情抱太多唔現實既幻想。

佢經常都問「我係咪好好？」應該係等緊你既肯定。
佢之前拍過既兩次拖可能都得唔到前任既肯定同讚許，所以先會努力表現、期望係你身上得到。

返完一日工食飽晚飯坐低（巴士）覺得眼訓，呢個可以理解。
其實你可以同佢一齊訓，如果坐過站、大家對視笑一笑何嘗唔係一種情趣。

無論點都好，佢堅持送你返屋企的確係一份心意。
不妨認真表達下你既欣賞同講聲多謝。
—————————
換一個角度看待一件事，就可以將負能量轉化為正能量。

拍過兩次拖唔代表佢好有經驗，可能佢只係冇嘢搵嘢黎講先會無限loop。
你可以唸D話題大家輕輕鬆鬆傾下，順便觀察佢既三觀同你吻唔吻合。

既然你知道佢所謂送你嘢好多時只係講講下，你咪當佢講笑，唔抱期待就唔會失望。

情侶磨合肯定需要花心思同時間，不過前提係雙方都要配合。
你可以留意佢願唔願意配合你，就知道佢對呢段感情係咪認真。
——————————————————
判斷一個人適唔適合自己既標準就係：

1）你同佢相處係咪舒服自在
2）佢肯唔肯同你溝通磨合
3）佢願意為你付出幾多
4）你願意為佢付出幾多
5）相處落你覺得呢個人可唔可以信任
6）佢既三觀同你係咪差唔多
7）佢既性格容唔容易相處
8）佢有冇為兩個人既將來努力
9）佢有冇為你著想/顧及你感受
10）大家能唔能夠滿足到對方既需求
——————————————————
經營一段關係從來都唔係易事，你起步得遲就應該更勤力/謙卑去學習同改善自己。

如果唔係你心急都冇用，你揀人人揀你。

你唔學點樣同異性相處、點樣調節自己既思維，同邊個一齊都只會浪費時間。

做一個令人喜歡同你相處既人，對方先會考慮同你結婚。

[匿名]

文字間都表現左你唔中意佢
只係想求其搵個人

[匿名]

換個角度睇，佢一上車就瞓到落車，代表佢真係好攰，咁攰都仲肯送你你仲想點！？同埋送到樓下係擔心你嘅安全，三字頭唔似廿幾歲咁好精力，以攰成咁嘅狀態送埋你返歸，呢種關心同陪伴其實真係好奢侈，如果你唔識珍惜就放手啦。

[匿名]

樓主之前未拍過拖唔知，其實作為男朋友有時都好想女朋友氹下🥲 唔想一直單方面付出
但你男朋友聖誕節件事真係唔得，24、25唔同你過，佢可能都想放棄呢段關係了
我覺得你地只係缺乏左深入既溝通，如果仲想嘗試同佢一齊既，同佢deep talk下啦，加油！

[匿名]

感情嘅問題一律建議分手

[匿名]

睇得出你地溝通得唔好，雖然唔知道你地係咪平時收收埋埋，到忍唔住先爆個種，但最好都多啲互相表達下對對方嘅諗法同埋感受。
值得讚嘅就讚，做得未夠好就互相提點下。都係一句，佢只係想你多啲肯定佢，同埋你都唔好凡事覺得必然
往好過方面諗，起碼佢攰都肯送你返去呢

[匿名]

做野攰上車瞓真係人之常情😂

[匿名]

😅點解唔係個男仔好難頂 可唔可以聆聽下對方講咩而唔係滿足自己做得好好 咩叫仲想點 想佢唔好送呀 不如算啦

[匿名]

你知自己好矛盾ga 呵？🤭 溝通唔到咪即係夾唔到lo, 你唔順佢d行為同思想係小事呀，咁係咪要下下發生出軌呢d 大事至可以分手？大家價值觀唔同都分得啦⋯
1）你跟本係年近30 想搵個水泡，同d人情傷搵水泡冇分別ga, 28 歲身邊朋友就算未結婚都有穩定感情，而你冇、你驚、你心急，一急個人咪亂揀野lo…下下睇到30 歲咁大件事，幾時得來40 歲50歲😂，揀個錯的人除左浪費時間，仲會激死自己，激一激、喊一喊個樣又殘少少，得不償失⋯
2）叫得水泡即係你冇咁快放手，建議你坦白一切睇佢唔順眼的事，吵架咪吵架lo, 唔明點解你要咁怕，下下陰d陰d咁講少少，明知佢蠢唔明白⋯倒頭來咪又你受返⋯
係唔需要佢送果程車就拒絕，係拒絕，同佢講唔係唔中意佢送，但覺得佢太眼瞓，次次在車都訓著，叫佢唔使再上車送，直接講係體諒佢，唔忍心佢累…放假送一次半次你已經好開心⋯
3）當佢再話送XXX 比你時，你直接講唔使，講左送咩就冇驚喜，而且你自己中意會自己買，應使得使唔好亂買野，或者你想串下佢的話咪話，今個月你大大話話都講左5樣野話送比我，你幾百萬未開頭呀？ 果度加埋都三四千wo, 不如咁啦，我生日至送，有咩中意我同你講⋯

其實大家都係開始果幾個月啫，你當磨合下，坦白講出不滿，係冇改善的話就即係唔夾⋯

[匿名]

你唔直接講，佢就係唔明白。
你唔想分手就直接講。雖然講完有可能佢都唔中意。

[匿名]

其實你根本唔鍾意佢，鍾意一個人你會珍惜佢送你返屋企嘅時光，佢訓著你會好自然心痛佢攰，依家我只見到你對佢嫌三嫌四，你只不過想是旦搵個人試下😢