1年兩次想要d儀式感，宜係咁難咩？

[匿名]

我同男友嚟緊下個星期8週年紀念日。最近我開始問佢週年紀念想邊日慶祝，因為正日同屋企人有活動，我就提議不如提早慶祝，想同佢食個晚飯，同埋問佢有無咩想做或者有plan，佢話無。呢個答案其實都唔出奇，因為咁多年，無論咩節日，生日，紀念日等等都幾乎係我安排好哂，早早諗定禮物，整手作或者準備surprise等等，平時出街都絕大部份係我諗去邊食咩。我無錢既時候就自己整蛋糕，整禮物，儀式感一定滿滿。

我明白儀式感呢啲嘢，未必個個都好重視，甚至有d人會覺得唔重要，同埋要安排同諗係真係麻煩既，但我覺得一段感情多多少少都需要啲情趣，儀式感去維持，同埋我覺得呢啲係真係回憶。好似佢第一年生日，我整比佢既生日蛋糕，佢到而家都好記住，講起都好開心，成日都想我再整返果個蛋糕比佢。因為咁我咁多年都做得好足，而我見到佢開心，我都好開心。

但前幾日，我問佢週年紀念點安排好，佢話是但，你鐘意啦，儀式感真係咁重要咩，唔想諗好攰。我聽到真係覺得唔係咁開心，我就同佢講，我每次都好花心思去安排，至少兩個月就plan好買咩，諗點準備驚喜，你每次都好開心架，唔係咩。然後佢答我，其實佢無特別開心，佢都無好記得我準備咩。我聽到果刻真係好心淡。

關於儀式感呢個問題，我其實有同男友講過無數次，我都無氣再同佢keep住請。我唔係想佢搞d咩大龍鳳，我只係想至少一年兩次，甚至淨係得我生日，準備下plan下，可能食咩餐廳，比我揀下，提議下去邊，我都好開心。但咁多年黎都好似準備唔超過4次，第一年整蛋糕比我，其中一年帶我去酒店食buffet，但食完飯,handmade銀包同埋上年情人節送左束干花比我，好幾次都食完個飯就走左，因為佢份工有時係要返夜班，但係好少，一個月最多一個星期，仲要有時係可以轉，可以揀唔反夜，但佢都係咁走咗。

其實我要求真係好多咩，就算唔想自己plan都起碼參與下嘛。我只係唔想感覺好似得我一個期待我哋之間既重要日子，真係我唔啱咩😞我好希望我男朋友可以理解下我，我真係用哂所有方法去表達佢知我想要咩啦。

如無意外，我諗我男朋友都會見到呢篇千字文，我想你知道，我唔係唔愛你，只係我都有自己需要既野，想你明白重視下。我想以後既咁多年可以繼續同你創造多啲回憶，體驗唔同既野，到我哋老婆婆老伯伯既時候可以攞出嚟笑下回味下，唔想無聊咁hea 過。Love u公仔🧸8週年快樂，希望我哋之後都可以一齊過更多既8週年啦🤪

[匿名]

最尾仲要表白，其實人地好似唔係好愛你咋喎⋯ 你問佢點解唔肯做？因為你開唔開心對佢嚟講都無關痛癢😬

[匿名]

只能講你可以值得更加好，完。

[匿名]

可能佢想同你求婚呢😂😂點同你講啊

[匿名]

有時唔係佢唔知，而係佢唔想整俾你😂你自己諗清楚啦😂

[匿名]

其實你男朋友可能知道㗎啦～話唔定下個星期真係有儀式感俾到你呢～冇都唔緊要嘅，只要真心愛對方嘅話呢一啲小問題無謂化大～最後鬧交大家都唔好受

[匿名]

睇完標題，一齊兩年係時候完

[匿名]

不如今年八週年紀念日嘅時候，個活動係用嚟傾下你地兩個之間嘅問題，佢無儀式感我覺得只係其中一part"小問題”，實際個大問題其實係佢根本無心“聽”同“記”你講嘅野……你講左咁多次要嘅佢都無注意下，其實呢個先係實際問題，不如趁呢日/前夕興祝嘅日子大家傾下，一齊得八年，有問題係應該一齊面對，一齊解決，個問題如果繼續唔攤開，遲早變大問題。見你都話仲愛對方先打呢段千字文，就趁仲愛，好好正面傾多啲，深入啲，面對下。加油吖

[匿名]

佢見到依篇嘢應該會同你分手多啲

[匿名]

有時你覺得自己安排好曬所有野 覺得對方會好開心 但其實可能你只係感動緊你自己 唔係感動緊對方

[匿名]

好明顯佢唔係唔識， 唔係唔知 ，只不過 佢懶得理你😂 佢肯娶你先算啦😂

[匿名]

睇得出你好俾心機準備依一切，你係一個好好嘅女朋友
但你地兩個對儀式感嘅睇法都好唔同，你男朋友應該唔想整依啲嘢
既然都同佢提咗咁多次佢都無反應，你都無謂再不斷問佢，免得越來越心淡
付出不一定有回報，亦千其唔好一廂情願
希望你早日搵到解決依個問題嘅方法～

[匿名]

你男朋友自私就一定啦，就算佢真係唔重視儀式感都要照顧下你嘅感受，仲要你已經強調過好多次儀式感對你好重要，佢都係無動於衷無諗住做多d野令你開心，要識得從生活上呢類事件去睇清楚對方係點樣嘅人

[匿名]

一開始接受卑微，永遠卑微，唔好覺得你可以改變到一個人，佢知道只不過永遠都唔會去做

[匿名]

呢個係價值觀問題wo .. 點解要強逼人地滿足自己 ...

[匿名]

我問過一對拍拖好sweet既情侶點keep既秘訣，就係儀式感😂不過對方好似唔上心、唔在乎，8年時間睇落都覺得長。真心建議佢再唔改變就唔好浪費時間