一星期見足五六日，佢都話唔夠

[匿名]

20 巴，女朋友同齡，一齊咗1年

我女朋友成日懷疑我啲friend想溝我, 搞到我啲朋友都遠離我。明明我哋已經一個禮拜見足5/6 日，佢竟然暗地裏周圍唱我啲friend，搞到我鬼咁尷尬。啲friend都少咗同我哋一齊玩，因為驚俾佢誤會。

另外，明明我哋一個星期已經見咁多日，佢都話唔夠，咁我都要啲私人時間㗎。我哋係因為做運動識嘅，點知而家佢話一齊做運動唔計拍拖時間時間。我已經唔知道我仲可以做啲乜，又要返學又要做運動，又要分配極大部份時間俾佢，佢竟然仲公然喺個public account度開story話我，仲要專登趁我瞓着咗嘅時候po，仲要tag埋我。呢啲私人嘢留返私下講唔得嘅，係咁鍾意周圍唱，真係俾佢叼晒啲架。

跟住近排我哋一齊去日本旅行，點知我出發嘅時候病咗，有啲感冒，咁都冇辦法啦照去。點知佢開story話，「病到係咁瞓覺，不如唔好嚟啦」。見到佢呢個story，我真係唔知講咩好，大佬病咗我都唔想㗎。唔去又要俾你話，去咗又喺度嘈嘈嘈，真係唔知點服侍你好。問心其實你有冇care過我？

有次我哋同場比賽，佢竟然因為自己打得唔好而叫我放棄自己嗰埸比賽去睇佢，同樣作為一位運動員，我唔明點解你可以叫我放棄自己嘅努力，放棄自己嘅比賽。

Sorry for 1999, 我真係好鍾意我女朋友但係佢下下咁樣我真係就快頂唔住。希望大家可以比啲意見。🤲🏻🤲🏻🤲🏻

[匿名]

分手會更好。

[匿名]

好唔成熟，性格同內涵都無🤷🏽‍♀️

[匿名]

你都應該出story寫返佢再tag佢
佢點做你點做 咁佢先知咁做有幾乞人憎

[匿名]

精神病患發現案

[匿名]

咁極品都可以哽到1年 respect🫡
老實講如果自己男朋友病到咁樣都仲係呢種態度完全唔心痛仲要出晒story公審？應該已經唔係正常女仔 師兄真係開善堂😂🙏🏻

[匿名]

一星期見5，6日點會夠？最起碼見20日🥺🥺

[匿名]

一星期見5，6日點會夠？最起碼見20日🥺🥺

[匿名]

建議唔好放出去害人

[匿名]

如果以我35歲同20歲的你講，好現實地又好多餘咁，我講咗同對牛彈琴無乜分別，因為我都後生過，如果咁理性嘅就唔叫青春啦，唔柒過邊有經驗之談。 後生仔，呢個世上無人迫你愛死一個人，而你知道佢性格係咁，但佢可能好靚女或者真係好你杯茶，但呢啲嘢都係今日打倒昨日的我，到你拖第2，3位女友時你自然會叫咩叫乜柒事勿回首。其實無咩實際意見俾你，你同佢可能只是生命中的過客，到結婚個位未必是佢或可能係佢，但你要諗吓，對方同你相處上你舒服嗎？請撇除慾體思想，如果你頂唔順無人迫你食C架，但你要迫自己食C，我俾咩意見你？ 同佢傾下個問題？我相信你有同佢傾過，咁有無改善過？ 我唔知，知了也沒關係，因為不是我受罪。如果你口講咁鐘意佢你唔會出post咁講，應該食咗呢淡C佢，拜託，冷靜地你自己諗吓，你想要乜？十年後再睇返今日出嘅post，你會明白架啦。Bro，希望你更愛自己。

[匿名]

放生當然係好，不過如果樓主有心立功德，最好就攬住一世，米鬼比佢出黎害人😆😆

[匿名]

咁都唔分唔好放佢出去害人😂

[匿名]

睇完你咁樣講好難保持中立🤡

[匿名]

1年唧 幾鍾意啊 飛左佢啦問黎都多餘。

[匿名]

叫佢改囉，不過其實我都幾肯定佢唔會改到，一個自私嘅人唔會咁易改，所以唔好嘥時間喺呢個人到啦，都20歲人啦，連溝通傾下問題都唔識，又唔顧人感受，為咗成全自己叫你退出比賽同嫌棄你病又要去旅行，呢個人會有幾愛你？

[匿名]

公主唔適合拍拖，適合搵奴隸多啲，而你又何苦20歲就去做奴隸？