如果當初無分手，依家既我地會係點？

[匿名]

佢係我由中學開始一齊左十年嘅初戀，我已經當左佢係家人，更一早認定左佢係結婚對象。我由十幾歲已經想嫁比佢，我覺得同佢一齊好舒服，大家唔洗特登將就都好夾，我由十幾歲同佢一齊，去到接近三十歲分開，我人生大半嘅青春都係同佢過，偏偏最終都係分開。

其實佢曾經對我好好，雖然有缺點，但我鍾意佢嘅程度已經沖昏左頭腦，即使佢嘅缺點愈來愈多，但我都一次又一次降低自己底線去接受，因為我愛佢。

25歲我開始憧憬結婚，但我知道對佢黎講25歲太年輕(我地同歲)，所以我知道25歲嫁得出係無可能。然後我奢望27歲可以拉埋天窗，但佢話未有錢結婚，佢話佢想同我結婚，但佢唔想浪費我青春，叫我搵過個更加好嘅人…果陣我聽到真係好心up，直到呢一刻我依然好傷心。我唔明點解佢口講想結婚，但又唔肯儲錢，係咪我唔值得佢為我付出？定其實無錢只係一個藉口？

後來過左段時間，佢對我態度開始有啲差，亦無以前咁關心我，我地關係開始疏離，亦有朋友見到佢對我嘅態度，覺得我值得更好，都會勸我要諗清楚係咪仲要一齊。

我有諗係咪因為一齊得太耐先會開始對我唔客氣，但當朋友都出黎勸我諗清諗嘅時候，我好似突然清醒一樣，覺得佢唔應該咁對我，我開始萌生左分手嘅念頭。

不斷好多人同我講我嘅條件好好，應該襯未登3搵過第二個，話唔埋會閃婚，對於當時好迷惘嘅我，真係一心諗住分手搵下家，等佢知道我係唔會無了期等佢，亦唔係無左佢唔得。
於是我提出左分手，佢同意亦無挽留，我地從此變最熟悉嘅陌路人。

分手就快兩年，的確有唔少人追求，有啲條件亦好唔錯，但嘗試一齊之後先發現原來搵一個可以夾到自己嘅另一半並唔容易，而我亦開始發現自己原來一直未放低…試過多次頻密地夢見佢，近排更加頻密，我以為只係因為同佢一齊左咁多年先會夢見佢，但後尾我開始懷疑自己。

就快30嘅我睇住身邊嘅人陸續求婚結婚，每次出席人地婚宴聽住人地講拍拖故事，我都不禁諗起佢，如果當初無分手，依家嘅我地會係點呢…

我已經好多次單方面想復合，但諗到就算復合都未必可以好似以前咁樣。亦有好朋友知我有復合呢個念頭，都不斷勸我唔好咁傻，因為覺得我值得更好。

當自己已經唔係1822嘅時候，我好驚自己做錯任何一個決定，我唔想為左結婚而同一個未必岩自己嘅人結婚，我試過同其他人拍拖，但個感覺就係唔對。我唔知係因為我將初戀變成左模版，定係自己未遇到真正嘅Mr Right，定係Mr Right其實就係佢。

我好亂，我好想搵番佢，我知道自己好犯賤，我知道父母好反對，我知道佢唔會因為我而改變佢嘅缺點，但係時間愈長，我愈發現自己未放低佢，甚至因為佢迷失自我同長期覺得好down…我好怕自己係一時發癲先想搵番佢

我真係好迷惘，我唔可以同屋企人傾，因為佢地好反對，我唔可以同朋友傾，因為佢地只會覺得我犯賤…

我唔知佢會唔會睇到呢個post，但係我想講一句
我知我係犯賤，但我一直放唔低你，我希望你會出現係我嘅將來…
我估你應該有另一半，但係如果佢同你唔係好夾，而你又未放低我，可唔可以比多次機會大家？

[匿名]

冇如果，亦冇咁多巧合，你醒吓

[匿名]

雖然好多細節冇寫，但唔想為咗結婚而求其搵個人一齊呢點，讚👍🏻🫡

[匿名]

你呢個完全係賭徒心態———因為投資左太多時間、心機，所以太唔甘心；導致沈淪落去、無法抽身。

你仲未由puppy love既美好幻想同印象入面走出黎面對現實，直到依家接近30歲都未意識到今時唔同往日。

結婚係平衡各方面條件黎配對，好難話搵就搵到一個完美match到自己既人，有得就有失。
—————————
你似乎忘記左，當初你同佢分開咪就係因為現實問題：佢唔肯儲錢、唔肯正面回答你幾時結婚、唔願意負起責任……

而呢D問題一直都係度，唔會因為你地分手而消失；亦即是話，你就算成功同佢復合之後一樣要面對。
——————————————————
自己既人生應該自己承擔，唔應該太過聽從朋友既意見；唔係話佢哋一定想害你，而係自身個心態唔啱。

聽從他人意見而揀既路，一旦有挫折你就會怨。
而自己考慮清楚揀既路，咬牙去堅持先會成長。

無論你選擇點做，都冇人可以話你錯。
但係做人要有尊嚴、有主見；你自己主動卑微，就唔可以怪人地唔當你係一回事。

[匿名]

呢兩年如果佢係仲愛你，放唔低你，掛住你嘅，一早就已經搵番你啦，你唔係仲想回頭嘛？我同我未婚夫一齊咗十一年幾都仲係咁恩愛，佢亦都一直對我好好，所以唔會因為一齊得耐就有藉口對人唔好架，我都三字頭，等咗咁耐終於嫁得出係好開心😂你值得更好的，仲有時間搵個岩嘅人過下半世，加油！！

[匿名]

自己感動自己😂笑死，分手人地都冇挽留又同意啦😂
想結婚先諗起佢

[匿名]

有緣會再遇見
如果到時候大家都單身，都想同對方係返埋一齊，就重新再開始過；如果對方有另一半，再遇見對方都好，幾句簡單的問好就完
遺憾讓你成長，將依份遺憾隨時間衝淡，慢慢放低，有啲嘢係返唔到轉頭，唔好俾佢阻住你前進
加油～

[匿名]

有冇諗過，你掛住嘅唔係佢，係個回憶俾你嘅感覺？

[匿名]

有時最愛果個，未必會同你過成世，而且你好清楚變果個係佢，唔係你，你就算回頭難道他又會變返以前甘？傻女，錫自己多D啦

[匿名]

❤️分清楚你對佢嘅係愛定習慣❤️

[匿名]

認真 如果冇父幹 27歲真係唔會有錢結婚
個個都fg 50k咩
住邊到？擺酒呢？禮金？那有錢 怪就怪香港樓市太k型

[匿名]

好老實呀 人地都冇留你 仲叫你搵第二個 其實佢都好似唔係愛你好多
同埋你覺得同其他人唔夾 可能有啲真係唔夾 但係我覺得你只係想搵另一個佢完成你自己既「初戀」多啲囉

[匿名]

回憶總是美好，加埋你憧憬同想像先咁不能自拔。趁後生真係放開d, 唔好咁多包袱。去個旅行，放開視野又會係一個方法啊。阿妹，世界好大，唔好依戀變質既前度

[匿名]

出面咁大個森林 淨係同一棵樹過既你，點知其他人好唔好啫 🫡

[匿名]

出面咁大個森林 淨係同一棵樹過既你，點知其他人好唔好啫 🫡

一齊左十年 其實都係習慣左🫠
你要跳出去第二個圈子生活
唔好成日諗返轉頭
有陣時有啲嘢係你就係你 唔係你就唔係你
要一齊返嘅話，始終都有機會
但唔係叫你等佢😂

[匿名]

打完咁多字，就當放低吧啦
就算一齊翻，都可能破壞當初印象
倒不如搵個新啦

[匿名]

如果無分手 可能會變離婚掛