明知我唔中意都同女同事一齊食飯放工

[匿名]

我同條仔一齊咗差唔多六年幾，佢一直以來都對我好好，冇乜嘢大問題，不過最近大家出咗嚟社會做嘢之後，發生咗一啲問題我真係唔識點處理。

本身都覺得大家喺異性接觸方面都有共識，以往都識得同異性保持界線，不過最近可能因為換咗新環境，覺得佢變咗，又或者其實根本冇變到，純粹係佢本身就係咁。

事情經過係咁，男朋友入咗新公司之後好受歡迎，都有新識到幾個異性朋友，咁因為大家都係同事我都冇乜所謂。不過最近覺得佢有個女同事好奇怪，會成日突然間text佢無關緊要嘅事情，可能係「頭先我見到xx野就諗起你！」「你份人真係好搞笑，我都幾鍾意同你傾偈」之類，或者會打電話，感覺兩個關係都幾好，有問過男朋友關於佢哋兩個嘅事情，咁男朋友話純粹幾啱傾同埋只係同事關係，所以我即使少少介意但係都算數。不過後期見佢哋傾得太密，我就忍唔住同咗男朋友講其實我覺得佢地好似有啲Close過頭，但係佢就發晒脾氣咁話我哋只係普通同事係你諗太多，跟住又鬧我控制慾強之類，不過後尾冷靜落嚟，佢都應承我之後除咗公事之外都唔會特登搵佢傾計。

有一次因為男朋友要加班差唔多11點幾先放工，咁我早咗放工就特登去搵佢，之後見到佢一邊打緊電腦文件個女同事一邊喺佢隔離同佢喺度傾緊計，咁我就安慰自己唔好諗咁多然後行埋去，男朋友嗰陣時咁啱耷低頭唔知我嚟咗繼續打字，個女同事見到我之後就啤左我一眼，然後突然成個心口靠落我男朋友背脊喺佢耳邊唔知講咩，果下我真係O晒嘴，完全估唔到啲咁戲劇化嘅情景會發生係自己身上。

嗰一刻我已經嬲到個腦一片空白，就即刻轉身打算離開咗男朋友公司，佢先發現到我嚟咗，就即刻追過嚟問我做咩事，然後我就發晒脾氣咁問佢點解可以咩都唔知，之後冷靜返再同佢講頭先嘅場景，佢就同我道歉頭先因為專心做嘢唔知道，同埋以後會盡量避開嗰個女同事。

雖然仲係好擔心，但佢咁樣同我講其實我都信佢，話晒咁多年感情。不過最近又發現佢開始同個女同事成日傾番計，甚至乎會一齊食飯一齊放工，再追問佢佢又發翻我脾氣話其實佢覺得個女仔完全冇其他企圖，係我Ff太多，作故事呃佢，佢信個女仔係好人唔係我口中嘅綠茶婊。

講真其實真係幾心淡，咁多年嘅感情真係唔想因為一個人而影響到，但係去到呢個情況我已經冇辦法唔介意，有冇人話俾我知點做，係咪真係我諗太多？同埋想問吓各位男仔，如果自己女朋友唔鍾意自己其中一個異性，會唔會為咗佢斷絕同個個人來往或者盡量避開，定係會完全唔care咁繼續來往？

[匿名]

個女嘅似乎就係等緊呢一刻
等你哋嘈交 等你哋不和 等你哋分手
再乘虛而入
男嘅緊係覺得無嘢㗎，條女主動獻身蝕底嘅又唔係佢

[匿名]

好遺憾地我要以過來人既經驗話你知：
·
由校園踏足社會對兩個人既關係真係好大挑戰。
·
最後大部分都冇好結果……因為冇經驗、心唔夠堅定、唔識處理環境改變之後衍生出黎既矛盾。
———————————————
我地首先假設你男朋友社會經驗太淺所以真心睇唔出個女同事別有用心。
·
咁你就要同對方玩心計了。
·
斷絕來往係冇可能，因為同事係一定會見面。
但千祈唔好逼男友辭職，呢個係大忌。
·
你應該努力幫男友物色更好既公司，引誘佢跳槽。
———————————————
但如果你男友係扮傻，開開心心落入個女同事圈套，你做咩都冇用。
·
不過即使事情真係演變到咁，都唔需要太難過。
·
出到黎社會你會發現校園只係一個井。
·
世界那麼大、優秀既男人那麼多，可能到時考慮其他人果個係你都唔定。

[匿名]

由佢發返你脾氣個刻 就已經知道輸左比新鮮感了

[匿名]

唔好成本沉沒，呢個只係惡性循環 你繼續去抱怨男朋友接近個綠茶，個綠茶表就會更加講點解你女朋友感情勒索你叫佢同啲異性斷絕來往，你哋關係只會更加差，會着緊你嘅男人就唔會令到你冇安全感唔開心。 有d女唔係因為鐘意個男人咁做，

[匿名]

呢啲嘢我都太多經驗.. 其實你個矛盾位, 道理就好簡單: 1) 你一係放縱條仔少少, 一係就更加管佢更多. 個問題係個個人都有 Temptation.. 你做前者, 一畀機會佢哋出多咗街食多咗飯飲多幾杯酒, 就會唔小心搞埋. 你管得佢多, 又驚有反效果. 所以其實兩樣都唔係 Solutions. 2) 除非嗰條女真係正, 或者長腿有身材. 正確做法係應該喺你男友面前不停咁話, 嗰條女好樣衰兼且勁肉酸. 你要不停洗腦同條仔呻, 你唔鍾意佢痴埋啲咁肉酸嘅女仔度, 日日講嗰條女邊樣邊樣走曬樣又肉酸塊面又上下左右比例唔正常... 佢行埋你條仔隔離都搞 Cheap 埋佢個形象. 你日日咁講包保佢最尾想扯都扯唔起旗！ 你以為淨係有啲女仔先收兵？ 男人其實都有呢個收女仔兵嘅慾望, 以為自己好有市場同吸引. 所以你要做嘅嘢就係要講到個對手係核突到無倫, 唔該你唔好咁 L Cheap, 連呢啲女都想上先係正解 (但係如果嗰條女真心正, 咁就嘥氣, 通常點都抵唔住誘惑 🙇🏻‍♂️)

[匿名]

佢應承完你都係冇改就知唔係咁簡單啦。

[匿名]

唔好再教個女仔點樣同機心女鬥啦，只會增加佢嘅妄想同沉沒成本，呢件事嘅根本原因就係個男仔度，佢嘅態度，說話同行為已經表明一切，冇謂係三角關係糾纏，比d時間自己慢慢收心放手。呢個係最保護到自己嘅方式

[匿名]

一段感情邊捱得過好多年😮‍💨 熱戀期過咗就會對另一個心動😌 分手啦😢 放過自己

[匿名]

條女有問題，你男朋友為左個普通同事同你發脾氣更有問題😂

[匿名]

你地散左之後佢地就會光明正大係埋一齊 信我🤗

[匿名]

分手吧 呢個擺明唔係純友誼
有時六年都唔代表行到落去
反而你地結婚前睇到佢呢一面 可能對你係一件好事
呢個時間搵朋友多啲食飯行街 慢慢抽離

[匿名]

六年感情又點，條女有問題，你男朋友都好有問題。 呢個世界唔係男就係女， 但係拍緊拖，同異性保持距離係基本。 啱啱出嚟做嘢，有女埋身，有新鮮感， 仲咁多藉口 。 呢啲仔飛咗佢啦，唔好浪費時間。 佢嘅行為已經唔值得你信任，已經破壞緊你嘅信任， 亦都完全唔尊重你，唔珍惜你哋六年感情。

[匿名]

咁ge男人唔使恨😂人地哄到咁埋，請埋食波餅都可以「唔知」？
6 年感情咋下麻？十幾年都可以貪新鮮啦⋯跟本人品問題，你亦唔需要懷疑係咪自己唔夠人好，係男方唔夠好，有女埋身就身痕，擺明知咩事就藉d 2 同你嘈⋯
信唔信丫？好快就會話「本來同個女仔冇野，但比你日講夜講，係你一手推開我」、「明明我冇野你都要屈我，咁我做好人來使咩呀？我就出軌比你睇」…唔使驚ga 阿妹，一定會發生ga！一定會！
你疊埋心水呢個人會走啦，唔好太恨個第三者，因為牛唔飲水唔㩒得牛頭低，有公廁都要有狗公去配合⋯唔係個個男人都啱公廁，但你男友就一定啱⋯唔講到咁你唔會醒⋯
我係你就多謝個第三者，咁好心機幫你揭發個賤男⋯唔係呢種女人咁中意爭人野，係唔會知對左6 年的係咩人⋯
你覺得浪費左6 年時間會唔甘心，會想爭過，或者你宜家都爭緊⋯但呢種咁enjoy d女投懷送抱的男人⋯唔係真傻，係扮傻⋯你咁努力爭個爛橙返來，又唔知下次幾時又有另一個咋⋯
你覺得好恐怖呢？ 個女仔明明見到你，都當住你面哄埋去⋯你諗深一層，你條仔明明眼尾望到，個鼻聞到個女仔哄埋去⋯佢都可以當住你面話「真係唔知」⋯好似更恐怖呀何？ 幾時都係「人比鬼可怕」！

[匿名]

結論：都快過年啦，仲唔換個新男友😊😇唔通等派帽咩？

[匿名]

現代人最有趣嘅想法就係覺得感情中有對錯之分。感情從來冇對錯，只有去留。

樓主會因為男友身邊嘅人而傷心係出自於愛，鬧男友嘅原因係想有安全感。

避得一個避得幾多個？你自己都係女人，我諗你唔會唔知人婊起上黎可以幾唔要面，每一個出色嘅人都會招惹狂風浪蝶，靚女會有人追，好仔會有人搶。

能夠建立關係嘅係愛，而唔係邏輯。而如果樓主想同男友有愛，一味以自己「啱」為藉口，實際上係向男友發洩情緒同希望男友向自己表達著緊而攞安全感只係死胡同。

好好向男友表達自己嘅脆弱同擔心，冇一個愛你嘅人會視而不見的。